Тантанада өлкә губернаторы Николай МЕРКУШКИН катнашты
Олимпия уты эстафетасы 24 декабрьдә Сызранда башланып, шуннан Тольяттига күчте. Ә 25 декабрьдә Самара урамнары буйлап 201 кеше чиратлашып Олимпия факелын күтәреп узгач, Куйбышев мәйданына аны 18 сәгать 30 минутта дзюдо буенча 2012 елгы Олимпиада чемпионы Таһир Камалетдин улы Хәйбуллаев китереп җиткерде. Тамашачыларның көчле алкышлары астында өлкә губернаторы Николай Иванович Меркушкин белән бергә алар касәдә Олимпия утын кабыздылар.
Николай Меркушкин үзенең чыгышында: “Бүген бездә тарихи вакыйга. Олимпия уты беренче тапкыр Самарага килеп җитте. Без бергәләп 7 февральдәге стартка кадәр Олимпия рухын сакларга тиешбез. Ә мин безнең олимпия командабызның бөтен ярышларда да җиңеп чыгачагына өметләнәм”, — дип белдерде.
Таһир Хәйбуллаев та үз чиратында: “Бүген Олимпия уты Самарада яшәүче һәр кешенең йөрәгендә кабынды”, - диде.
Бәйрәм чаралары Куйбышев мәйданында төнгә кадәр дәвам итеп, Олимпия уты Ульяновск шәһәренә озатылды.
(“Волга-Ньюс” сайтыннан).
Просмотров: 1320