26 апрельдә шәһәребезнең Үзәк китапханәсендә Сызран татар милли-мәдәни автономиясе бөек шагыйребез Габдулла Тукайның туган көненә багышланган кичә үткәрде.
Бу чарага әзерлек эшләре күптән алып барылганлыктан, нәтиҗәсе дә күренерлек булды. Өстәлдә — татар милли бизәкләре төшерелгән самовар, төрледән-төрле милли ризыклар, тәм-томнар.
Кичәне Наил Йосыпов ачып җибәрде. Ул күптән түгел генә Самараның техник университетын тәмамлап, яшьләрнең информация үзәгендә җитәкче булып эшли башлаган. Гөлнара исемле кыз белән алар кичәгә җентекләп, яшьләргә аңлаешлырак булсын өчен ниндирәк формада үткәрү яхшырак булыр, дип киңәшеп әзерләнгәннәр. Оешма ветераны Галиулла ага Габдрәшитов та аларга күп ярдәм иткән. Шуңа да олылар сүзен тыңлап, хәзерге заман яшьләренә ошарлык итеп әзерләнгән кичәнең мастер-класс дәрәҗәсендө үтүенә гаҗәпләнерлек түгел иде.
Галиулла хаҗи сүз алып, Габдулла Тукайның берничә шигырен укыды, тормышыннан аерым вакыйгалар, аның татар әдәбиятына ясаган зур тәэсире турында сөйләде. Тукайның әдәби язмалары бик бай һәм эчтәлекле, сихерле шигырьләре балаларны гына түгел, дөнья күргән олыларны да уйланырга мәҗбүр итә. Шуңа да аларны төрле яшьтәге кешеләр яратып укый, ятлый, буыннан-буынга күчереп бара.
85 яшьлек Сәгадәт Әүхәт кызы безнең барлык милли-мәдәни кичәләрдә дә бик актив катнаша. Менә бүген дә ул үзенең берничә шигырен сөйләде, татар яшьләрен милли гореф-гадатләребезне, йолаларыбызны сакларга, татар мәдәниятен үстерүгә өндәде.
Варламово авылы китапханәсе мөдире Зөбәрҗәт ханым Байбикова Габдулла Тукайның ятимлек ачысын татып үскән балачагын, яшүсмер чагыннан ук шигърияткә мөкиббән китеп, тиңсез шигъри әсәрләр язуы турында сөйләп үтте. Зөбәрҗәт ханым Сызран татарларын үзенең китапханәсенә дә чакырды. Ул анда татар язучылары, шагыйрьләре һәм композиторларының басма әсәрләрен, алар турында язылган аналитик материалларны туплап бара икән.
Фәрит ага Абделхәй дә кичәдә катнашучыларга үзенең кулъязмаларын һәм Тукай турында шигырьләрен укып күрсәтте. Аның моңлы тавышы халыкка билгеле инде. Фәрит ага җырлаганда да, азан әйткәндә дә аны барысы да яратып тыңлый.
Менә шулай, кунаклар өстәлдәге чәй-ризыклардан авыз итә-итә Габдулла Тукайга карата хөрмәт тойгыларын белдерделәр. Мондый кичәләр, “түгәрәк өстәл”ләр яшьләргә милләтебезнең телен һәм әдәбиятын, дин белемен һәм мәгариф дәрьясын яхшырак аңларга ярдәм итә.
Сызран шәһәренең татар милли-мәдәни автономиясе җитәкчесе Илсур Гыйльманов герой-шагыйребез Муса Җәлил иҗатына багышлап та чара уздырылачагы турында белдерде.
Рәис БИГЛОВ, хәрби ветеран.
Сызран шәһәре.
Просмотров: 1308