Бүген, 1 сентябрьдә, Самарның һәм өлкәбезнең барлык мәктәпләрендә дә Белем бәйрәмен билгеләп үттеләр. Шәһәребезнең «Яктылык» татар мәктәбендә дә укучылар тантаналы линейкага бастылар.
Быел биредә 400дән артык бала белем алачак, ә беренче сыйныфлар икәү булачак.
«Яктылык»лыларны бәйрәм белән котларга күп хөрмәтле кунаклар да килгән иде: Самара шәһәр округы депутаты Вячеслав Гришин, “Яктылык”ның беренче директоры, хезмәт ветераны Хәридә ханым Дашкина, Самар өлкәсе мөселманнарының региональ Диния нәзарәте рәисе, мөфти Талиб хәзрәт Яруллин, халыкны хуплау һәм социаль яклау идарәсе җитәкчесе Әлфия Мифтахова, өлкә татар милли-мәдәни автономиясе башкарма комитеты рәисе Әнвәр Горланов, Самара шәһәренең татар милли-мәдәни автономиясе җитәкчесе Рифкать Хуҗин, региональ «Дуслык» иҗади-иҗтимагый оешмасының вице-президенты Рафыйк Бадамшин, Самар шәһәренең «Нур» мәдрәсәсе ректоры Али Сөләйманов, «Ак барс» банкы хезмәткәрләре һәм башкалар. Мөхтәрәм кунаклар укучыларга тырышлык, укытучыларга сабырлык, күңелле вакыйгаларга, “бишле”ләргә генә бай уку елы теләделәр.
Аннан соң беренче сыйныфка баручы сабыйлар шулкадәр күп халык булуына аптырап, югалыбрак калып, тырыша-тырыша татар телендә шигырьләр сөйләделәр. Ә 11нче сыйныфта укучы апа-абыйлары аларга уңышлар теләделәр, үзләренең бүләкләрен тапшырдылар һәм кулларыннан җитәкләп, парталар артына кертеп утырттылар. Һәм беренче дәрес башланып китте.
Яңа уку елында яңа казанышлар сезгә, укучылар һәм укытучылар!
Римма НУРЕТДИНОВА.
Просмотров: 2746
У нас не Мордовия, платки есть