7 ноябрьдә Самараның Куйбышев мәйданында дүртенче тапкыр Хәтер парады уздырылды
1941 елда Куйбышевта уздырылган парад истәлегенә багышланган чаралар һәрвакыт төрле темаларны күтәрә. Быелгысы, мәсәлән, милләтләр дуслыгына багышланып, округ дәрәҗәсендә үткәрелде. Кунаклар Идел буеның унике регионыннан, вакытында шундый ук парадлар үткәрелгән Мәскәү һәм Воронеж шәһәрләреннән дә килгәннәр. Шуларның берсе – Воронежда яшәүче Россия Герое Юрий Анохин. Ул мәйдан аша үткән 83 расчетның һәрберсен честь биреп каршы алды һәм озатып калды.
Күрше Татарстаннан да зур гына вәкиллек бар иде. Араларында олы яшьтәге хатын-кыз — Рәхилә ханым Абдуллинаның булуы гаҗәпләндерде. Ул фин сугышы вакытында әсирлеккә эләгә, “Таабатти” концлагеренда тоткынлыкта интегә һәм күпмедер вакыттан соң аны һәм иптәшләрен фин татарлары азат итәләр. Финляндиядә яшәүче канкардәшләребезне ул әле дә хөрмәт сүзләре белән искә ала.
Губернаның Үзәк мәйданы аша бу көнне биш меңләп кеше узды, ә парадны трибуналардан карарга меңләгән кеше килгән иде. Мөхтәрәм кунаклар, сугыш, тыл һәм хезмәт ветераннары трибуналарга менеп баскач, өлкә губернаторы Николай Меркушкин тантананы башлап: “Куйбышевта уздырылган Хәтер парадының 73 еллыгы белән тәбрик итәм! 1941 елда шундый парадлар Мәскәүдә һәм Воронежда да уздырылган. Мондый чаралар халкыбызның корычтай рухы һәм ихтыяр көче символы булып хезмәт итәләр. Россиядә яшәүче төрле милләт халыклары каты сынаулар чорында берләшә, дәррәү көч булып дошманга каршы күтәрелә белә. Куйбышев мәйданыннан турыга сугышка киткән 3нче армия солдатлары Берлинга кадәр барып җиткәннәр, шушы армия составындагы гаскәр әләме Рейхстаг өстендә күтәрелгән”, — дип сөйләде.
Губернаторның рәхмәт сүзләре күбесенчә ветераннарга багышланган иде, әлбәттә. Аларның күпчелеге хәзер юк инде, ә исәннәре бик олы яшьтә, мондый көзге суык көннәрдә парадларга йөри алмыйлар. Ә менә тыл ветераннары әле дә сафта. Шулар арасында Самараның Җәмигъ мәчетенә йөрүче татар бабайлары да байтак иде. Аларның зур төркеме бу көнне аерым бер эскәмияне тутырып утырды. Самара өлкәсе мөселманнарының региональ Диния нәзарәте рәисе, мөфти Талип хәзрәт Яруллин аларны бәйрәм белән котлап, барсына да исәнлек-саулык, озын гомер теләде.
Менә парад та башланды. Быел мәйдан аша гадәти парад расчетларыннан соң Халыклар дуслыгы йортында эшләүче милли-мәдәни оешмалар вәкилләре дә узды. Һәр оешма үз милләтенең әләмен күтәреп чыккан иде. Әйе, һәр милләт Бөек Ватан сугышына үз батырларын биргән, күп югалтулар кичергән.
Татарлар исеменнән парадта Самараның “Дуслык” иҗади-иҗтимагый оешмасы вәкилләре мәйдан аша узды. Ә ахырда төбәгебезнең атаклы “Ялкынлы яшьлек” ансамбле үзенең ялкынлы биюләре, моңлы җырлары белән бәйрәм концертына татар бизәкләрен дә өстәде.
Хәмзә МОРТАЗИН.
Автор фотосурәтләре.
Просмотров: 1670