Хәтерлим мин…

Февральнең беренче ял көннәрендә Россия мәктәп­лә­рендә очрашу кичәләре үткәрү гадәте бар. Самараның “Яктылык” татар мәктәбендә дә андый очрашулар гел булып тора. Быел биредә мәктәпне 20, 15, 10, һәм 5 ел элек тәмамлаган укучылар очраштылар. Без дә, 2013 елда гына мәктәпне тәмамлаган булсак та, очрашуга барырга булдык.

Сыйныфташларым кичә баш­лану вакытыннан күпкә ал­дарак килеп куйганнар. Кочаклашу, хәл белешү, смартфон һәм телефон фотока­мераларына төшерелгән уңыш­ларыбыз белән уртаклашу, мактанышу китте. Дөрес, без, бер төркем классташ кызлар, Румия Хуҗина (фотода сулдан икенче), Рамилә Яһудина (дүртенче), мин – Эльвира Йосыпова (бишенче) һәм Әлфия Сөләйманова (алтынчы), Самара экономика университетының төрле курсларында укыганлыктан еш очрашып торабыз. Ә менә Алия Бирюкова (фотода сулдан беренче) медицина университетында укый. Шуңа күрә без аны сырып алдык һәм анда уку җиңелме, яңа дуслар таба алганмы, юкмы – шуны сораша башладык. Шул вакытта безне татар теле укытучыбыз Фәния апа Гыйләҗева белән бергә фотога төшереп алдылар да.

Очрашу тагын да күңеллерәк үтсен өчен, 11нче сыйныф укучылары безгә бик матур концерт әзерләгәннәр иде. Очрашуга килүчеләр дә яшьлек елларын искә төшерү өчен сәхнәгә чыгарга булдылар. Алар да бит заманында җырлап-биеп, төрле чараларда катнашып үскәннәр. Мәктәбебезне ун ел элек тәмамлап чыккан апа-абыйларның чыгышы безгә бигрәк тә оша­ды. Алар ике атна буе кичләрен мәктәптә репе­тицияләр үткәргәннәр, күптәнге бию костюмнарын табып, шулар үрнәгендә яңаларын тектергәннәр. Шуңа күрә бу көнне аларга тиңнәр табылмады. Вакытында бу сыйныфның хореографы булып эшләгән Рәшит абый Гыйззәтуллин аларның балачактагы видеоязмаларын саклаган икән. Номер шунысы белән кызыклы булды: башта кечкенә чактагы язма экраннан күрсәтелде, аннары апа-абыйлар шул ук биюне кабатлап биеделәр. Бик матур килеп чыкты.

Мәктәпне 15 ел элек тә­мамлаган Лилия апа Рәхимова Муса Җәлилнең “Вәхшәт” ши­гырен сөйләгәндә моңа кадәр гөрләп торган зал кинәт тынып калды. Ул аны шул кадәр йөрәкләнеп, шундый аяныч белән сөйләде ки, хәтта күбе­безнең күзләрендә яшь бөртекләре күренде.

Таһаутдинова Гөлшат апа­ның (ул “Яктылык”ны тәма­ла­ганнан соң педуни­вер­си­тет­ның чит ил телләре фа­культетында укыган һәм үзенең мәктәбенә инглиз те­ле укытырга кайткан) чыгышы да бик гыйбрәтле булды. “Яктылык” мәктәбенә рәхмәтләрен белдереп: “Мин шушы мәктәптә укыдым, татар телебезне, го­реф-га­дәтләребезне өй­рән­дем, классташым Илдар Гозәе­ровка кияүгә чыгып, матур татар гаиләсен кору бәхетенә ирештем. Хә­зер инде без Илдар бе­лән өченче балабызны көтә­без. Бу уңышларымда мәк­тә­бебезнең роле ифрат та зур”, — диде ул. Безнең мәктәптә үз парын табучылар арасында тагын Йосыф белән Юлия Сәйфетдиновларны һәм Илфат белән Әлфия Сө­ләй­мановларны атарга була.

Кичә ахырында бергәләшеп Габ­дулла Тукайның “Туган тел” җырын башкардык. Бу да без­нең мәктәпнең күптәнге традициясе.

Классташлар белән очрашу кичәсе безгә, кендегебез мәктәптән аерылып бетмәгән балаларга, бик ошады. Очрашу тәмамлангач та әле халык таралышмады, һәр чыгарылыш үз укытучылары белән класс­та сөйләшеп утырды. Укытучы апалар, директорларыбыз Хәридә апа Дашкина, Дания апа Әбдерәхимова әле дә әниләребез кебек якын, бөтен эшләребез, эчке халәтебез белән кызыксынып торалар, тормышта уңышлы булуыбыз белән горурланалар. Шуңа күрә без аларның йөзенә кызыллык китермәскә тырышып яшибез.

Эльвира Йосыпова,

Самара дәүләт экономика университеты студенткасы.

«Бердәмлек».

Просмотров: 2061