Казаннан рухланып, шатланып кайттык

Искән­дәр бе­лән Җәмилә Мингали­мовлар Казанда узган фес­тиваль вакытында.

Әле күптән тәгел генә Татарстанның Казан шәһәрендә сукырлар һәм начар күрүчеләр җәмгыятенең  90 еллыгына һәм Бөек Җиңүнең 70 еллыгына багышланган  “Җиңү салюты” дип аталган Бөтенроссия халыкара фестивале булып үтте. “Бердәмлек”нең үз хәбәрчесе шушы тантанада катнашу бәхетенә ирешкән Камышлы авылында яшәүче, өченче группа инвалиды Искәндәр Сәйфулла улы Мингалимов белән әңгәмә корды.

- Искәндәр әфәнде, үзе­гез­нең бу фестивальгә ничек ба­руы­­гыз турында сөйләсәгез иде.

- Безнең Кләүледәге сукырлар һәм начар күрүчеләр оешмасына Кләүле, Шенталы, Похвистнево, Камышлы районнарында яшәүчеләр керә. Без баштан Самара шәһәрендә үткәрелгән конкурста катнашып, хәләл җефетем Җәмилә белән призлы урын яуладык һәм икенче дәрәҗә диплом белән бүләкләнгән идек. Аннан соң Кләүле районы үзәгендә шушы оешмабызның туксан еллыгына багышланган  бәйрәм үткәрелде. Биредә дә җәмәгать эшләрендә актив катнашуым өчен мине Мактау кәгазе белән бүләкләделәр.

Ә соңрак, шушы тантана­ларның дәвамы буларак, Та­тарстан башкаласы Казан шәһәрендә Бөтероссия халыкара сукырлар һәм начар күрүчеләр җәмгыятенең иҗа­ди фестивале уздырылды да инде. Тантанага җиде төбәктән: Чувашиядән, Марий Элдан,  Самара, Пенза, Ульяновск, Киров өлкәләреннән һәм Татарстанның үзеннән күп ку­нак­лар килгән иде.

- Шушы фестивальдән ал­ган тәэсирләрегез, ачылу тан­танасы турында да ишетәсе иде.

- Бөек Ватан сугышы елларында илебезнең бәйсезлеге өчен, фашист илбасарлары белән көрәшкә сукырлар һәм начар күрүчеләр дә зур өлеш керткәннәр. Шуның өчен безнең оешма Хезмәт Кызыл Байрагы ордены белән бүләкләнгән дә инде, — дип сөйләде бәйрәм тантанасын ачып җибәргәндә фестивальнең жюри рәисе, Таһир Котдус улы Хаялетдинов.

Гомумән, бәйрәм бик матур үтте. Биредә һәркем үзенең милли киемнәрен, гореф-га­дәтләрен, матур йолаларын күр­сәтергә тырышты. Барыбыз да рәхәтләнеп җырладык,  биедек. Мин Җәмиләм белән татар биюе башкарып, ундүрт катнашучы арасында икенче дәрәҗә дипломга ия  булдым.

Киләчәктә дә мондый матур чаралар күбрәк уздырылсын иде, фестивальләрдә һәркем үз талантын күрсәтергә омтыла бит. Ә бу кешенең рухын үстерә, күңелен күтәрә. Менә шулай шатланып, рухланып, киләчәккә яңа матур планнар корып кайттык без Казанда уздырылган Бөтенроссия халык­ара фестиваленнән.

Нурсинә ХӘКИМОВА.

Камышлы авылы,

Камышлы районы.

«Бердәмлек».

Просмотров: 1588