Көтмәгәндә, авырмый-нит­ми генә, 59 яше барганда, тук­санынчы елларда ун елга якын “Бердәмлек” газетасында бүлек мөдире, җаваплы секретарь булып эшләгән, соңгы вакыт­ларда басмабызның штаттан тыш хәбәрчесе булган каләм­дәшебез, Россия Журна­лист­лар берлеге әгъзасы Ис­хак Хәнәфи улы Апанаев ара­быз­дан бакыйлыкка китеп барды.

Тумышы белән Пенза өлкә­сенең Неверкино районы Октябрьск авылыннан булган, тук­санынчы еллар башында Мәскәүдә яшәгән Исхак Са­марада “Бер­дәмлек” татар газе­тасы чыга башлаганын ише­теп, безгә еш кына үзенең язма­ларын җибәреп тора иде. Ә бераздан бөтенләйгә “Бер­дәм­лек”кә ки­леп, эшкә ур­нашты.

Укучыларыбыз аның ту­ган телебезне саклап ка­лу, дине­безгә кайту, гореф-гадәт­­ләребезне, бәйрәмнә­ре­безне торгызу турында язган язма­ларын яратып кабул итте­ләр. Төрле сәбәпләр арка­сында аңа яраткан эшеннән, коллективыннан китәргә туры килсә дә, Исхак “Бердәмлек” газетасы хезмәткәрләре бе­лән элемтәсен өзмәде, гел безнең белән аралашып, хәбәрләшеп тора иде. Соңгы елларда газетабызда байтак кына саллы язмаларын да бастырып чыгарды ул. Әле тагын киләчәккә планнары бар иде аның.

Тик шәфкатьсез үлем Ис­­хакны арабыздан алып китте. Аны 31 январьда улы Ил­дар, апалары, абыйлары, се­ңел­ләре, башка туганнары Сама­радан туган як­ларына кайта­рып, Мазарлы авылы зиратында җир куенына тапшыр­дылар. Без аларның барсының да олы кайгыларын уртаклашабыз.

Талантлы каләмдәшебезне, кешелекле, гадел иптәшебезне беркайчан да онытмабыз, исән чагыбызда гел хәтеребездә сакларбыз, аның язмалары да, әйтелгән фикерләре дә “Бердәмлек” битләре аша ки­ләчәк буыннарга барып җи­тәр, дип өметләнәбез.

Хуш, каләмдәшебез, безгә рәнҗи күрмә, урының оҗмахта булсын!

“Бердәмлек” газетасы хезмәткәрләре һәм укучылары исеменнән баш мөхәррир Рәфгать ӘҺЛИУЛЛИН.

«Бердәмлек».

КОНТЕКСТ:

Исхак Апанаев вафат…

Просмотров: 1423