Утыз яшькә кадәр ике бала тапкан хатын-кызларга өстәмә акча түләмәкчеләр. Илнең хезмәт һәм социаль яклау министры Максим Топилин әнә шулай дип белдерде. Яшь әниләр акчасы Ана капиталыннан тыш биреләчәк. Берәүләр яңалыкны хупласа, икенчеләр исә министрны сүгеп үк ташлаган. Бала табаргамы, юкмы?
Бүген Россиядә беренче баласын табучы хатын-кызларның уртача яше 26-27гә җиткән. Министрны әнә шул борчуга салган, күрәсең. Ул яшьләрне тизрәк бәби алып кайтырга өндәү юлын эзләп тапкан. Булачак әниләрне акча белән кызыктырмакчылар. “Утыздан соң бала табу ул – начар түгел, әлбәттә, – дип тә өстәгән Максим Топилин. – Тик әнинең сәламәтлеге, алга таба өченче, дүртенче бала алып кайту күзлегеннән чыгып караганда, хатын-кызга утыз яшькә кадәр ике бала тапса, күпкә яхшырак”. Дөрес, министр ике бала әнисенә тәгаен күпме акча түләргә җыенулары турында әйтмәгән. Аның каравы, яңа төр матди ярдәм Ана капиталын алмаштырмаячак, дип искәрткән. Яңалык алдагы ике-өч елда ук гамәлгә керергә мөмкин. Хәзер исә икенче һәм аннан соңгы бала алып кайткан гаиләләргә Ана капиталы сертификаты бирелә. Әлеге закон илдә 2007 елда гамәлгә керде. Быел акчалата ярдәмнең күләме 453 мең сум тәшкил итә. Аны сабыйга өч яшь тулгач, торак шартларын яхшыртуга, баланы укытуга яки әнинең булачак пенсиясенә тотарга рөхсәт ителә. Закон 2018 елның 31 декабренә кадәр гамәлдә.
Топилинның тәкъдимен Россия Дәүләт Думасында да хуплаганнар. Гаилә, хатын-кызлар һәм балалар мәсьәләләре буенча комитет рәисе Ольга Епифанова сүзләренә караганда, яшь гаиләләргә матди ярдәм күрсәтү – балалар санын тагын да арттырачак. Акчага өстәп, ташламалы ипотека программасы да кирәк, дип белдергән ул. “Гаилә һәм балаларга ярдәм итүгә бәйле тәкъдимнәрнең барысын да хуплыйм. Ана капиталы яхшы, әлбәттә. Тик ул яшь гаиләләрнең торак мәсьәләсен хәл итми”, – дигән депутат. Ул эш урынында үсешкә ирешергә теләүче хатын-кызларны да кайгырткан. Ольга Епифанова балалар бакчаларында нәниләр өчен төркемнәрне кире кайтару мәсьәләсен күтәргән. “Совет чорында нарасыйны өч айдан ук яслегә алалар иде”, – дигән депутат. Сайлау алдыннан ниләр генә ишетмәссең, билләһи.
Югары икътисад мәктәбенең социаль сәясәт һәм социаль-икътисадый программалар институты директоры Сергей Смирнов исә үзгә фикердә. Аның сүзләренә караганда, 30га кадәр ике бала табарга җөрьәт иткән гаиләләр болай да аякта нык басып тора. “Аларга өстәмә рәвештә матди ярдәм күрсәтүнең әллә ни кирәге юк. Өстәвенә казнада болай да акча җитми. 30 яшьне каян алганнар? Ә ник 25 түгел? Бу 30дан соң бала табучыларны кимсетә дип саныйм”, – дигән ул. Мәсьәләдән чыгу юлын да тәкъдим иткән: хатын-кыз 30га кадәр ике бала таба икән, Ана капиталы акчасын тиешле вакытыннан алда файдаланырга рөхсәт итсеннәр.
Хатын-кызлар ник бала табарга ашыкмый? Психолог Алисә Закамская әйтүенчә, бүген гүзәл затлар гаилә учагы турында гына түгел, ә карьера хакында да уйлана. “Бала үз бәхете белән туа дип фикер йөртүчеләр дә бермә-бер кимеде. Бәби тапканчы, иң элек аның киләчәген кайгыртып куярга тырышалар: бишек белән бергә нарасыйга фатир да сатып алалар хәтта. Әнә шуңа күрә 40 яшьтә бала табу гадәти күренешкә әйләнде”, – ди белгеч.
Гөлназ ГЫЙЛӘҖЕВА, 30 яшькә кадәр өч бала тапкан яшь әни:
– Дәүләттән мондый “рәхмәт” яңа гына аякка басып килә торган яшь гаиләгә сизелерлек ярдәм булыр иде. Бездә бит университет тәмамлагач ук яхшы, керемле эшкә урнашып калмасаң, соңрак: “Сез безгә яшь буенча туры килмисез”, – дип кире борып җибәрәләр. Шуңа күрә яшьләр карьера төзергә омтыла, кесә ягын кайгырта. Берничә танышымнан: “Икене, өчне дә табар идек, ул балаларны кая алып кайтыйк соң? Үз торагыбыз юк, кеше фатирында яшәгән өчен акча түләп торабыз. Баланы матур киендерәсе дә килә. Хәерче үрчетүдән файда юк”, – дигән сүзләр ишетергә туры килде. Өстәмә матди ярдәмне мин акча өчен бала табу түгел, ә бала табарга мөмкинлекләр тудыру чарасы дип атар идем. Дәүләт Ана капиталын түли башлагач, туучылар саны шактый артты. Дөрес, әлеге проектны кабул итү белән беррәттән яңа балалар бакчалары һәм мәктәпләр төзү программалары да гамәлгә керсен иде.
Просмотров: 912