Җәмилә ШӘРИФУЛЛИНА (сулдан беренче) һәм Мәдинә ЗАКИРОВА (уртада) төрекмән егетләре белән.

Чарага килүчеләр арасында канәгатьсезләр дә булды: «Элек Спорт сараен дер селкетеп үзебезнең Нәүрүзне үткәрә идек. Сабан туеннан бер дә ким узмый иде ул. Ә хәзер сәхнәгә чыгып җырлаучы да юк», — дип көрсенделәр кайберәүләр…

Нәүрүз — яңа көн, язгы чәчү эшләре алдыннан үткәрелә торган төрки телле халыклар бәйрәме  безнең өлкә авылларына, район һәм шәһәрләренә дә килеп керде. “Самара өлкәсе халыклары берлеге” иҗтимагый оешмасы, өлкә Губернаторы администрациясе белән берлектә Халыклар дуслыгы йорты аны халыкара бәйрәм буларак бишенче тапкыр үткәрә. Быел да ул бик матур узды.

Бу көнне Самараның “Родина” скверында иртән-иртүк бәйрәм рухы хөкем сөрде. Музыка уйнап торган сәхнә янында кулларына һава шарлары тоткан бәләкәчләр бөтерелә, оештыручылар арлы-бирле йө­ге­решеп, барысының да әзер­леген тикшерә. Милли киемнәрен киеп килгән  кызлар һәм егетләр көлешә-төр­тешә шаяралар. Алар бу бәй­рәмнең иң матур бизәге сыман.

Сквер юллары буйлап те­зелгән палаткаларда милли оешмаларның күргәзмәләре урнаштырылган. Аларны сырып алган халык арасыннан кайсылары азәрбайҗан музыка уен кораллары белән кызыксына, икенчеләре милли киемнәргә киендергән курчак­лар белән хозурлана. Читтәрәк үзбәкләр чәйханәләрен куйганнар.  Өсләренә — озын чапан, башларына түбәтәй, чалма киеп, аякларын бөкләп утырган дин кардәшләребез белән фотосурәткә төшәргә теләүчеләр чиратка баскан.

Өлкә “Туган тел” татар җәм­гыяте директоры Фәрхәт Мәх­мүтов тырышлыгы белән эшләнгән палаткабыз да экспо­натларга бай иде. Анда һә­вәскәр рәссамыбыз Азат ага Надыйровның “Су анасы”, “Сабан туе”, “Шүрәле” рәсемнәре, татар милли киемнәре эленгән. Ә өстәлләрдә Мәүлид һәм Римма Низамовлар пешереп килгән бавырсаклар, кош телләре, кул остасы Алсу Баязитова чиккән түбәтәйләр, кулъяулыклар, мен­дәр тышлары тезеп куелган.

Менә биюләр башланды. Татар кызлары шулай шома бас­ты, егетләре җилкенеп биеде ки, хәтта оешманың президенты Ильяс Шәкүров та аларга кушылды. Иң көчле алкышларны очып биегән тугыз яшьлек Самат Мәхмүтов өзеп алды.

Аннары Фәрхәт Мәхмүтов барысын да “Капка” уенына чакырды. Баштарак тартынып торган тамашачылар бераздан инде оештыручылар белән рәхәтләнеп күңел ача иде. Моны читтән күзәтүче татарлар, һичшиксез, актив, сәләтле милләттәшләре өчен горурлык хисләре тойганнардыр. Тик менә бәйрәмнең төп өлешендә катнашмавыбыз гына күңелне тырнап алды.

Бәйрәмнең төп чарасы “Саумы, Нәүрүз” дип аталган күренештән башланып китте. Өлкәдә яшәүче төрки телле милләт вәкилләре Халык­лар дуслыгы йорты байрагы астында сәхнәгә күтәрелеп, илебезгә, халыкка  тынычлык теләделәр, үзара дус яшәргә вәгъдә ит­теләр.

Бәйрәмгә килгән мөхтәрәм кунаклар да шул теләктә булдылар. Өлкә администрациясенең җәмәгатьчелек фикерен өй­рәнү департаментының милли һәм конфессиональ сәясәт идарәсе җитәкчесе, баш консультант Надежда Осипова халыкны бәйрәм белән котлаганнан соң губернатор Николай Меркушкинның хатын укыды. “Өлкәбездә 157 милләт халкы үзара дус, тату яшәве белән горурлана. Без барыбыз да Самара җирендә яшибез, аның чәчәк атуы өчен күп көч куябыз. Бүгенге кебек күркәм бәйрәмнәрне дә бергәләп үткәрү милләтара дуслыкны ныгыта, бер-беребезне, го­реф-гадәтләребезне хөр­мәт итәргә өйрәтә”, — дип языл­ган иде хатта.

Николай Иванович өлкәнең милли оешмаларына, региональ “Самара өлкәсе халыклары берлеге” иҗтимагый оешмасы рәисе Ростислав Хугаевка, өлкә мөселманнарының региональ Диния нәзарәте рәисе, мөфти Талип хәзрәт Яруллинга халыклар дуслыгын ныгытуга куйган тырышлыклары  өчен рәхмәт белдергән.

Губерна Думасы рәисе Вик­тор Сазонов: “Санкт-Пе­тер­бург­та булган фаҗига турында барыбыз да бе­ләбез. Террористлар безне куркытырга теләгәннәр иде, тик зур кайгы халыкны берләштерде генә. Безнең көчебез — бердәмлектә!” — дип,  шушы минутларда Самараның Куйбышев мәйданында терроризмга каршы митинг баруы турында белдерде. Халык Санкт-Петербургтагы терактта һәлак булган корбаннарны бер минут тынлык белән искә алды.

Самараның тарихи мәчете имамы Наил хәзрәт Биктаев өлкә мөселманнарының региональ Диния нәзарәте рәисе, мөфти Талип хәзрәт Яруллин һәм шәхсән үз исеменнән бәйрәмне оештыручыларны, килгән кунакларны сәламләде.

- Нәүрүз — төрки телле халык­лар бәйрәме. Ул яз һәм якты көн символы буларак кабул ителә. Киләчәктә дә Нәүрүз тынычлык, дуслык бәйрәме буларак үткәрелсен. Барыгызга да тыныч көннәр телим, йөзләрегездә шатлык нурлары балкысын, табыннарыбыз мул булсын, — диде ул.

Самаралыларны бәйрәм белән шәһәр башлыгы Олег Фурсов, Промышленность рай­онының администрация башлыгы Минәхмәт Хәлиуллов,  Вол­гарь бистәсендәге Дуслык паркы дирекциясе җи­тәкчесе Игорь Буров, “Өлкә азәрбайҗаннар лигасы” рәисе Ширван Керимов һәм башка мөхтәрәм кунаклар котлады.

Рәсми өлештән соң сәхнәне артистлар биләде. Берсеннән-берсе чая кызлар-егетләр, сә­ләтле балалар моңлы тавышлары, дәртле биюләре белән бәйрәмгә ямь өстәделәр.

Чарага килүчеләр арасында канәгатьсезләр дә булды. 

- Элек Спорт сараен дер селкетеп үзебезнең Нәүрүзне үткәрә идек. Сабан туеннан бер дә ким узмый иде ул. Ә хәзер сәхнәгә чыгып җырлаучы да юк, — дип көрсенделәр ирле-хатынлы Наил һәм Тәнзилә Вахитовлар. Асия Халикова һәм Земфирә Сабировалар да бәйрәмдә татар артистлары чыгыш ясамавына уфтандылар.

“Туй үпкәсез булмый”, — ди­ләр бит. Тик гөрләтеп зур туйлар үткәрү зур чыгымнар да таләп итүне онытмасак иде. Бүген Самарада эшләп килүче татар милли оешмалары, очын-очка ялгап, гореф-гадәтләребезне, мәдәниятебезне үстерүгә юнәл­­телгән чаралар үткәреп то­ра­лар, ә Нәүрүзне башкалар­дан аерым үткәрү өчен мөм­кин­лек юктыр инде.

Нәүрүзнең халыкара бәй­рәм буларак үтүе бәлки отыш­лырактыр да? Тагын кайда әле төрле милләт халыклары мәдәниятенең төрлелеге бе­лән хозурлана алыр идек? Миңа калса, бу күпмилләтле бәй­рәмдә татарлар бер дә ким булмады.

Алия АРСЛАНОВА.

 «Бердәмлек».

КОНТЕКСТ:

В Самаре отметили межнациональный Навруз (ФОТОГРАФИИ)

Просмотров: 911