Апрель урталарында Казанда татар теле һәм әдәбияты буенча V Халыкара олимпиада уздырылды. Анда Татарстан районнарыннан, Россиянең 25 төбәгеннән һәм Австрия, Төркия, Казахстан, Япония, Үзбәкстан, Кыргызстан, Бельгия, Франция, Канада, Кытай, Литва, Азәрбайҗан, Берләшкән Гарәп Әмирлекләре илләреннән 500дән артык мәктәп укучылары һәм студентлар катнашты.
Гадәттәгечә, бәйгедә чит илләр һәм Россия катнашучылары арасында ике Гран-при иясе билгеләнде. Аларны Япониядән Мидзуки Накамура һәм Татарстан Республикасының Саба районыннан Ризәлә Йосыпова алды. Ә икенче һәм өченче урыннарга Самараның “Яктылык” татар мәктәбе укучылары — 9нчы сыйныф укучысы Гүзәлия Шәкүрова (укытучысы Нурзидә Фәйзуллина) һәм 11нче сыйныф укучысы Гөлнара Галимова (укытучысы Фәния Гыйлаҗева) ия булдылар.
- Беренче көнне татар теле һәм әдәбияты буенча язма эшләр үтәдек. Биремнәр кыенлыклары буенча бер-берсеннән аерылып тора иделәр. Мәсәлән, рус телендәге текстны татарчага һәм, киресенчә, татарчадан русчага тәрҗемә итү әллә ни кыенлык тудырмады, ә менә бирелгән текстка тиешле сүзләрне кую өчен морфология, фонетиканы, тел белеме буенча терминнарны яхшы белү кирәк булды, — дип сөйләде Гүзәлия Шәкүрова.
Балаларны бәйгегә алып барган укытучы Фәния Гыйлаҗева да үз фикерләре белән уртаклашты.
- Иҗади бәйгедә балаларга “Минем илем (регионым)” темасына презентация ясарга, үзләренең вокал, хореография, сәнгатьле сөйләм буенча сәләтләрен күрсәтергә тәкъдим ителде. Кызларыбыз бу турда да сынатмадылар.
V Халыкара олимпиаданың югары дәрәҗәдә оештырылуын дә әйтеп үтәсе килә. Сынаулардан тыш, һәрвакыттагыча, бай һәм кызыклы мәдәни программа да әзерләнгән иде. Казанның данлыклы урыннарында экскурсияләрдә булдык, Галиәсгар Камал исемендәге татар Дәүләт академия театрының “Ак калфагым төшердем кулдан…” (Илдар Юзеев) спектаклен карадык. Арча районындагы Габдулла Тукай музее белән таныштык. Соңгы тапкыр баруымнан соң аның тагын да матураюы, яңа экспозицияләр белән баетылуы мине бик куандырды.
“Баскет-холл” спорт комплексында үткән бүләкләү тантанасы да күңелдә зур тойгылар калдырды. Махсус эффектлар кулланышында сәхнә бизәлеше дә, җиңүчеләрне бүләкләү мизгеле дә искиткеч булды. Тантанада Татарстан Республикасы Президенты Рөстәм Миңнехановның катнашуы бу чараны тагын да дәрәҗәлерәк итте.
Японияле Мидзуки Накамураның Гран-при алуы да Россия төбәкләреннән килгән укучыларны, укытучыларны уйланырга мәҗбүр итте. Әби-бабасының татар кешеләре булуын ишетеп кенә белгән кыз үзе теләп татар телен өйрәнә, киләчәктә Япониядә татар теле дәресләрен укытырга да хыяллана, — дип сөйләде ул.
Бәйгедә мартта узган төбәкара олимпиадада призлы урыннар яулаган Фәния Нурсәхи кызының тагын өч укучысы — Айтурган Осмонова, Ксения Петрова һәм Гүзәл Хәйбуллова катнашкан иделәр. Алар призлы урыннар яуламасалар да, олимпиададан хисләнеп кайтканнар.
- Төбәкара олимпиада Россиядә яшәүче татар балаларын җыйса, халыкара олимпиада бөтен дөньяга сибелгән татар халкын берләштерә, таныштыра һәм татар исемен, мәдәниятен, телен яңа, югары дәрәҗәгә күтәрә. Без бу бәйгедә Самара өлкәсен лаеклы тәкъдим иттек, минемчә, — дип кичерешләре белән уртаклашты Гүзәл Хәйбуллова.
Алия АРСЛАНОВА.
Просмотров: 997