Өчесе дә уңган һәм булган

Солтания Фәйрузова (сулдан уңга), Фәнүзә Сәлахова һәм Рифа Җуматдинова.

8 июнь — Социаль хезмәткәрләр көне

Адәм баласының гомере бигрәк тиз үтә икән. Балалар үсеп, чит якларга китеп, үзләренә оя коргач, һәр өлкән кешенең башында: “Киләчәктә ничек яшәргә?” — дигән сорау туа. Менә шундый чакта борчу-мәшәкатьләреңне бүлешердәй, көн саен килеп хәлеңне бе­лердәй, тәмле ашлар пешереп сыйлардай, күңелдәге авыр уйларны оныттырырдай кеше кирәк була.

Бәхеткә, Камышлы рай­онының Чулпан авылында да бар икән әле андыйлар. Күптән түгел мин өлкән яшьтәгеләргә социаль хезмәт күрсәтүче Солтания Фәйрузова, Рифа Җу­матдинова һәм Фәнүзә Сә­лахова белән очрашып, сөйләшеп киттек.

Беренче булып сүзне Солтания ханым башлады:

- Минем әле кечкенә чагымда әбием: “Авылыбызда япа-ялгыз, баласыз, пенсия дә алмаучы бер әби яши иде. Мәрхәмәтле авыл халкы аны ташламады, гел ярдәм итеп торды. Шуңа да, күрәсең, ул озын гомерле булды”, — дип сөй­ли иде. Димәк, шул вакытлар­да ук мәрхәмәтлелек булган. Ә бүген бездә өлкән яшь­тәге ялгыз кешеләр өчен реаби­литация үзәге оештырылган.

Без җиде әби-бабайга хез­мәт күрсәтәбез. Өс-баш­ла­рын, идәннәрен юабыз, өй­ләрен җыештырабыз, мунча кертәбез, бакчаларын эш­кәртергә ярдәм итәбез, кышларын капка төпләрен кардан чистартабыз, район үзәгенә барып, торак-коммуналь хез­мәтләренә түлибез, аптекадан дару, кибеттән азык-төлек сатып алып китерәбез. Гомумән, көнкүрештә карт­ларның нинди хаҗәтләре бар, барсын да үтәргә тырышабыз, — дип берсен-берсе бүлдереп, сүзгә Рифа Җуматдинова белән Фә­нүзә Сәлахова да кушылдылар.

Фәнүзә ханым урын-җир өстендә ятучы каенатасы белән каенанасын да тәрбияли икән әле. Ә Солтания ханым караган Маһинур әби Ганиятуллина култык таякларына гына таянып йөри. Шундый хәлдә булса да, әбекәйнең балалары янына китәсе килми. Ул үзенең тәрбиячесеннән бик канәгать.

Солтания Фәйрузова (сулдан уңга), Фәнүзә Сәлахова һәм Рифа Җуматдинова.

- Мин биредә егерме ике ел эшлим. Без бу эшкә күнгән инде. Бер дә авырсынып торганым юк, әгәр дә кемдер авырып китә калса, төнлә дә янына барам, — дип сөйләде Рифа ханым.

Авыл Мәдәният йорты мө­дире Гөлнур Кәримова да со­циаль хезмәткәрләрне мактап туя алмый.

- Авылыбызда картлар өчен төрле мәдәни чаралар үткәргәндә, алар берен­челәрдән булып эшкә алыналар, тәмле аш-сулар хәзерлиләр, сәхнәдә җырлыйлар да, бииләр дә, — диде ул.

Менә шундый мәрхәмәтле, хезмәтләрен яратучы ханымнар яши Чулпан авылында.

Нурсинә ХӘКИМОВА.

«Бердәмлек».

Просмотров: 1138