Саулыгым – байлыгым

Алия Атлас кызы ТӨХБӘТОВА.

Июнь аеның өченче якшәмбесендә
Медицина хезмәткәре көне билгеләп үтелә

Саулыгым – байлыгым, дип юкка гына әйтми ха­лык. Ялгыш бармагыңны киссәң дә, кечкенә генә яра күпме борчу тудыра. Ә инде эчке әгъзаларың авырта башласа, кәеф бөтенләй төшә. Сызланасың, сукранасың, тә­мам йокыңны югалтасың… Шунда ук табибка йөгереп барырга да бит – шикләндерә. Ә менә күтәренке кәеф белән Медицина хезмәткәрләре кө­не белән котлау өчен хас­та­ханәгә бару, киресенчә, бик тә шатлыклы гамәл. Бүгенге әңгәмәдәшем — өлкә кар­дио­логия үзәгенең 5нче бүлеге мөдире Алия Атлас кызы ТӨХБӘТОВА.

Кемгә — ничектер, ә минем өчен бу медицина учреждениесе бик бәхетле урын. 1991 елда мине, “Бердәмлек” газетасы редакциясендә әле генә эшли башлаган яшь хәбәрчене, танылган кардиолог, ул вакытта 5нче  һәм 6нчы кардиология бүлекләре мөдире, ә соңрак баш табиб урынбасары булып эшләгән Румия Имам кызы Мифтаховадан (ул 2015 елда вафат булды инде)  интервью алырга җибәргәннәр иде. Абруйлы табиб хәбәрче тәҗрибәсез дип тормады, ачык йөз белән каршы алып, сорау­ларыма тулы җавап биреп, чәйләр эчереп озатып калган иде. Аның җиңел кулы белән башлаган эшемне менә инде 25 ел буе дәвам итәм һәм юлымда  гел Румия Имамовна кебек яхшы кешеләр генә очрап тора.

Хәзер инде бишенче бү­лек белән Алия Атласовна җитәкчелек итә. Ул медицина институтын тәмамлаганда ук шушы кардиология үзәгенә практикага эләгә һәм Румия Имамовна кебек абруйлы, кызыксынучан һәм шул ук вакытта масаерга яратмаучы, интеллигентлы табибларга, би­ре­дәге дустанә, иҗади атмосферага сокланып, сайлаган профессиясенә тәмам гашыйк булып, шушында эшләргә кала.

Заманында күп еллар Камышлы район хастаханәсенең баш табибы булып эшләгән әтисе Атлас Мөхтәбәр улы Төх­бәтовның йогынтысы да зур бул­­гандыр. “Мин балачактан ук үземне табиб дип күз алдына ки­терә идем. Шуңа мәктәптә дә тырышып укыдым, институтка да җиңел генә керә алдым”, — дип сөйли Алия Атласовна.

Ул да ачык йөзле, үз профессиясен яратучы, белүче, бөтен игътибарын, белемен җи­геп пациентларына ярдәм итәргә тырышучы кеше булып чыкты. Киң эрудицияле кеше белән нинди темага да сөйләшүе кызыклы. Шулай да, Рамазан аена туры килгән Медицина хезмәткәрләре көне алдыннан беренче соравым дин һәм сәламәтлек турында булды.

- Алия Атласовна, елдан-ел ураза тотучыларның са­ны күбәя бара. Бигрәк тә олы яшьтәге кешеләр аның бер көнен дә калдырмаска ты­ры­шалар. Ә йөрәк һәм кан та­мырлары авыруы булган ке­шегә ураза тотарга ярыймы соң?

- Йөрәк-тамыр авыруы булган, инфаркт кичергән кешеләр витаминнарга, калий һәм магний кебек йөрәккә файдалы матдәләргә бай ризыклар белән даими тукланырга тиеш. Чөнки аларның йөрәге катастрофа кичергән яисә кичерү алдында тора. Шуңа күрә организмга сыйфатлы ашамлык, чиста су, вакытында һәм җитәрлек күләмдә дарулар таләп ителә.

- Шулаен шулайдыр ул. Ләкин бит безнең татар халкы гореф-гадәтләрдән тай­пылырга ашыкмый. Ба­ла­чактан куе гына май­лы шулпага, камырына мар­гарин салып, эченә сарык ите тутырып пешерелгән бә­лешкә күнеккән. Меди­цина күзлегеннән бу файда­лы булмаса да, әби-ба­ба­ларыбызның тәмле аш­ла­рын­нан аерылуы мөмкин түгел.

- Аерылырга кирәкми дә. Мин үзем дә әти-әни янына авылга кайтканда токмачны бик яратып ашыйм. Тик әнием итнең майсызрагын сайлап алырга кирәк икәнен яхшы белә. Бәлеш тә өстәлдә көн саен булырга тиеш түгел. Күп хәрәкәтләнү, күбесенчә җиләк-җимеш, яшелчә белән туклану, эштә дә, өйдә дә тыныч атмосфера булдыру кан басымын дарусыз да төшерә ала. Ләкин кан басымы булган кешегә даруларны даими рәвештә эчеп торырга кирәк. Хәлең начарлана башлагач кына эчү дөрес түгел, инсульт яисә инфаркт булырга да мөмкин. Шул вакытта безгә кичектергесез чаралар күрергә туры килә.

- Әйе, табиблар һәрвакыт җәяү йөрергә кирәк, дип сөйләп торалар. Кая инде шәһәр җирендә җәяү йөрү! Һавасы начар, аралар ерак. Өйдә утыруың хәерлерәк…

- Һава начар дисәң, фитнес үзәкләрендә җәяү йөрү өчен тренажерлар, йөзү өчен бассейннар бар. Балачактан спорт белән шөгыльләнергә кирәк. Ләкин “качалка”ларга көн саен йөреп, авыр-авыр гантельләр күтәрү файда китерми. Спорт залыннан арып түгел, ә энергия туплап кайтуны максат итеп куярга кирәк.

- Ә үзегез фитнес белән шөгыльләнәсезме соң? Гому­мән, буш вакытыгыз булганда ни эшлисез?

- Әйе, атнасына 2-3 мәртә­бә кардиотренажерда шөгыль­лә­нәм. Ә эш­тә проблемалар була калса, тавыш куптармыйм, машинама утырам да мак­сатсыз-нисез шәһәр урамнарын әйләнеп йөрим. Шулай нер­выларым тынычлана һәм проб­лема үзеннән-үзе юкка чыга.

Ә табигатькә чыкканда, яисә чит илләргә барган­да сән­гатьле фотосурәтләр тө­шерергә яратам. Алар миндә бихисап. Менә кабинетыма да күчеп килә башладылар инде. Бераз вакыт эленеп торганнарын яңаларына алыштырып торам. Үзенә күрә фотокүргәзмә ясыйм инде. Кабинетыма кер­гән кешеләрнең дә, табигать матурлыкларын күреп, кәефе күтәреләдер, сәламәтлекләре артадыр, дип ышанам…

Менә шундый кеше ул, Алия Атласовна. Табигать-анадан ае­рылмасаң, күп ашамасаң, тик тормасаң, Аллаһы Тәгалә кушканнарны үтәп яшәсәң, һичшиксез, сәламәт булырсың, дип ышана ул. Күптән түгел генә 50 яшьлек матур юбилеен билгеләп үткән Алия Төх­бәтовага сәламәтлек һәм күңел көрлеге теләп калыйк. Безгә дә хастаханә ишекләрен табиб­ларны котлау өчен генә ачып керергә насыйп булсын иде.

Эльмира ШӘВӘЛИЕВА.

«Бердәмлек».

Просмотров: 1179