Бу кояшлы аяз көндә өлкәбезнең барлык мәктәпләрендә Белем бәйрәменә багышланган тантаналы линейкалар уздырылды.
Похвистнево районының Гали авылы мәктәбендә бәйрәм тантаналы рәвештә узды. Сыйныф җитәкчеләре Ләйлә Гозәерова артыннан мәйданга чыккан 21 беренче сыйныф укучысын алкышлап каршы алдылар. Балалар үзләренең рәхмәт хисләрен матур җыр, сәнгатьле шигырьләре аша җиткерделәр. Мәктәп директоры Мөхтәр Алтынбаев, килгән мөхтәрәм кунаклар быел мәктәпне тәмамлаучы 10 укучыга бердәм Дәүләт имтиханнарын уңышлы тапшырып, югары уку йортларына керергә теләкләр теләделәр. Белем бәйрәме сыйныфларда узган ”Тынычлык дәресе” белән дәвам итте.
- Камышлы район үзәге мәктәбе укучыларын, аларның ата-аналарын һәм укытучыларын бәйрәм белән өлкә спорт министрының беренче урынбасары Андрей Харин, Камышлы районы башлыгы Рафаэль Баһаутдинов һәм авыл җирлеге башлыгы Заһид Сафин тәбрикләделәр.
«Беренче кыңгырау белән мавыктыргыч белем дөньясына ишек ачыла. Яңа уку елы кызыклы чараларга һәм иҗади ачышларга бай, ә мәктәп тормышы эчтәлекле булсын», — дип котлау сүзләрен җиткерде Рафаэль Камил улы Баһаутдинов. Кызыклы бәйрәм программасыннан соң беренче сыйныф укучысы Амелия Әхмәтҗанова һәм уку алдынгысы, чыгарылыш сыйныф укучысы Артур Фәттахов беренче кыңгырауны яңгыраттылар, — дип яза Камышлыдан хәбәрче Ирина Макарова.
Ә Самараның Южный город микрорайонында 1 сентябрьдә 1500 укучы сыйдырышлы яңа мәктәп ишекләрен ачты. Бу зур вакыйга һәм яңа уку елы белән укучыларны, укытучылар коллективын өлкә губернаторы Николай Меркушкин, Самара өлкә Дәүләт Думасы депутатлары Леонид Симановский һәм Надежда Колесникова котладылар. Регион башлыгы бу вакыйганы Самара өчен тарихи дип белдерде.
- Архитектура ягыннан да, материаль-техник база белән тәэмин итү ягыннан да мәктәпкә илебездә әлегә тиңнәр юк. Россиянең мәгариф һәм фән министрлыгы җитәкчелеге дә аны илебезнең иң шәп мәктәбе дип атады. Әлбәттә, бу исемне аклар өчен укытучыларга да, укучыларга да күп көч куярга туры киләчәк. Быел биредә беренче сыйныфка укырга килгән балалардан 10 сыйныф тупланган. Бу бик әйбәт күрсәткеч. Без бергәләп бу сабыйларны илебезне көчле, ә тирә-яктагы кешеләрне бәхетле итә алучы шәхесләр итеп тәрбияләргә тиешбез, - диде ул.
Тантаналы линейкадан соң кунакларга мәктәп буенча экскурсия үткәрделәр. Уку йортында цифрлы формат мөмкин кадәр күп кулланыла. Холларда регионның мәгариф порталына керү, уку расписаниесен белү, баланың электрон көндәлеге белән танышу өчен махсус терминаллар куелган.
Кунаклар алдынгы технологияләр белән җиһазландырылган лаборатория, уку класслары белән дә танышып чыктылар. Губернаторга фото һәм тавыш яздыру студияләрен, рәсем ясау бүлмәләрен дә күрсәттеләр.
Спорт үзәге — яңа мәктәпнең горурлыгы. Бинада биш универсаль һәм бер гимнастика залы, футбол кыры, волейбол мәйданы, йөгерү өчен махсус юллар да бар.
Яңа мәктәп укытучылар коллективы белән дә мактана ала. Анда эшләргә теләк белдергән 500 претенденттан иң шәп 84 укытучы сайлап алынган. Алар арасында яшьләр дә бар, тәҗрибәле белгечләр дә юк түгел. Ә мәктәп директоры итеп 2013 елда “Россиянең ел укытучысы” исеменә лаек булган Владимир Кильдюшкин билгеләнгән.
- Бүген минем һәм педагоглар коллективы өчен бик дулкынландыргыч көн. Мәктәбебез белем бирү сыйфаты буенча Россиядә иң шәп уку йорты булуы өчен бөтен көчебезне куеп эшләячәкбез,- дип сөйләде җитәкче һәм мәгариф өлкәсенә зур игътибар бирүе өчен губернаторга рәхмәтен белдерде.
Әминә ШИҺАПОВА әзерләде.
Просмотров: 970