50 мең километр юлны велосипедта узу теләге белән юлга чыккан грузияле Нодар Беридзе шушы көннәрдә Самарага килеп җитте.
850 көн эчендә утызлап ил аша 50 мең километр юл үтәргә планлаштырган ул. “Дуслык юлы” 2016 елның 17 октябрендә Тбилисидан башланган. Иран һәм Казахстан аша үткәннән соң, сәяхәтче Уралны һәм Ерак Көнчыгышны буйсындырган, Владивостоктан — Испаниягә, ә аннан Төркия аша Тбилисига әйләнеп кайтырга тели.
- 38 градуслы салкыннарда да педальләр әйләндерүдән туктамадым. Мин салкынга чыдам, чөнки армиягә алынгач, Ерак Көнчыгышта хезмәт иткән идем. Һава торышы начар булганда узып баручы автомобильчеләр туктап миңа ярдәм тәкъдим иттеләр. Кемдер чәй, кемдер яхшы сүз белән куәтләде. Әлбәттә, бу миңа көч өстәде, — дип сөйләде ул Самара корреспондентларына.
Нодарның бу идеясен бөтен Грузия патриархы Илия II да хуплап: “Грузиягә көчле Россия, ә Россиягә бербөтен Грузия кирәк”, — дип әйткән.
Сәяхәт “Россия халыклары Ассамблеясе” гомумроссия иҗтимагый оешмасы карамагында уздырыла. «Төп максатым — элеккеге Советлар Союзы Республикалары белән дустанә мөнәсәбәтләрне яңарту. Дөньяда тынычлык урнаштырудан да яхшырак гамәл юк. Спорт һәм мәдәният, фән һәм техника өлкәләрендә ярышырга кирәк, ә корал ясау ул бик начар эш. Бер-беребезне хөрмәт итеп яшәсәк иде”, - дип тәмамлады сүзен сәяхәтче.
Самараның Куйбышев районында Нодар Беридзе Бөек Җиңүнең 70 еллыгына багышланган Геройлар Аллеясына чәчәкләр куйды, шунда үскән Грузия агачы төбенә су сипте. “Волгарь” бистәсендә төзелүче Дуслык паркы җитәкчесе Игорь Буров сәяхәтчегә парктагы төрле милләт халыклары утырткан агачларны, төзелүче милли йортларны күрсәткәч, Беридзе мондый паркларны һәр илдә, һәр шәһәрдә төзергә кирәклеген билгеләп үтте: “Грузиягә дә Самарадан үрнәк алырга кирәк, — дип белдерде ул. — Мондый паркларда халыклар берләшә, ата-бабаларыбыздан калган мирасны кадерләп сакларга өйрәнә. Дуслык бар нәрсәдән дә өстен бит”.
Спортчы исән-сау кайтып җиткәч, велосипедын Тбилисиның спорт һәм тынычлык музеена тапшырырга җыена.
Киләчәктә ул Җир шарын әйләнеп чыгу турында планнар кора.
Эльвира РӘФЫЙКОВА.
Просмотров: 813