“Бердәмлек” газетасы редакциясенә көн саен диярлек хатлар килеп тора. Укучыларыбыз авыл тормышы, төрле кызыклы вакыйгалар, үзләрен борчыган мәсьәләләр турында язалар, шатлыкларын уртаклашалар, киңәш сорыйлар. Менә шушы көннәрдә генә Кошки районының Яңа Карамалы авылыннан бер хат килеп төште. Шул авыл мәктәбе китапханәчесе Әлфия Галимова безгә үзе оештырган балалар түгәрәге турында язып җибәргән. Без бу хатны укучыларыбызга да тәкъдим итәргә булдык.
“Мәктәбебездә татар балалары шактый булса да, татар теле дәресләре укытылмый. Ә нәни милләттәшләребез халкыбызның мәдәнияте, иҗаты белән кызыксына. Аларга гореф-гадәтләребезне, йолаларыбызны өйрәтү максатыннан, өч ел элек мәктәптә “Дуслык” балалар түгәрәге оештырган идем, бүген анда унбиштән артык укучы шөгыльләнә. Шуларның күпчелеге — күрше Иске Җүрәй (Иске Фәйзулла) авылыннан йөреп укучылар (балалар саны аз дип, анда мәктәпне бөтенләй яптылар). Түгәрәккә таҗик, азәрбайҗан балалары да теләп йөри. Без татар халык җыр-биюләрен өйрәнәбез, төрле чараларда актив катнашабыз. Кошки районының “Шире круг” балалар фестивале, “Мисс һәм Мистер ЭТНО” округ бәйгесе кебек зур чараларга әзерләнгәндә ата-аналар да бик теләп ярдәм итә. Укучыларымның бу бәйгеләрдә төрле дәрәҗәдәге дипломнарга ия булулары минем өчен иң зур бүләк.
Укучылар белән җәйге каникуллар вакытында да кызыклы очрашулар оештырам — бергәләп табигать почмагында ял итәбез, чәй өстәле артында әңгәмәләр уздырабыз.
Дуслыклыларга рухи-әхлаки тәрбия бирү максатыннан Иске Җүрәй авылы мәчетенә экскурсияләр дә оештырам. Җирле имам Габделхәт хәзрәт Халитов балаларны мәрхәмәтле, әти-әниләргә, өлкәннәргә карата итагатьле булырга өйрәтә, гыйбрәтле вәгазьләр сөйли. Бу дәресләр укучыларыма заяга китмәс, дип уйлыйм.
Түгәрәк эшчәнлегендә проблемалар да юк түгел. Шуларның берсе — сәхнә киемнәребез булмау. Иске Җүрәй авылы үзешчәннәре үзләренең милли костюмнарын биргәлиләр, ләкин алар барысы да зур, балалар аларда көлке күренәләр. Зур чараларда катнашканда күрше Надеждино авыл клубыннан костюмнар алып торырга мәҗбүрбез. Шулай да төшенкелеккә бирелмибез, «Костюмнар юк» дип, бу чараларда катнашмый калмыйбыз. Иң мөһиме — балалар мәдәниятебезне өйрәнергә тели, түгәрәккә зур теләк белән йөриләр. Мин дә аларга карап дәртләнәм, иҗат бәйгеләрендә катнашырга рухи азык табам”, — дип язган милләттәшебез хатында.
Аның балалар белән күңел кушуы буенча шулай шөгыльләнүе, ана телен өйрәнүгә кызыксынуы, гореф-гадәтләргә, йолаларга мәхәббәт тәрбияләве, һичшиксез, ихтирамга лаек.
Язманы Әминә ШИҺАПОВА әзерләде.
Просмотров: 1232
бу бит журэй балалары