Үткән шимбәдә Самараның Киров мәйданындагы Мәдәният сараенда бишенче мәртәбә пәйгамбәребез Мөхәммәт Мостафа галәйһиссәлләмнең туган көненә багышланган Мәүлид ән-Нәби бәйрәме уздырылды. Бу чара башка еллардагы кебек Региональ Диния нәзарәте белән берлектә “Дуслык” өлкә иҗади-иҗтимагый оешмасы тарафыннан оештырылган иде.
Мәүлид бәйрәме Мәдәният сараеның чишенү бүлмәсе яныннан ук башланды, дип әйтергә була. Нәкъ шунда эшкуарлар Мәүлет һәм Румия Низамовлар чәкчәк һәм бавырсак, талкыш-каләвә һәм төрле сорттагы хәлвә өемнәре артында киң елмаеп кунакларны каршы алып тордылар. Икенче катка күтәрелсәң — анда да “Түбәтәй” тиз ашау челтәре пешереп китергән өчпочмаклар һәм гөбәдияләр, өлешләр һәм бәлешләр исе таралган. “Дуслык” оешмасына караган “Ак калфак” өлкә хатын-кызлар оешмасы җитәкчесе Разия ханым Әюпова, Похвистнево районындагы Мәчәләй, Гали авыллары бүлекчәләре җитәкчеләре Асия Исмәгыйлева һәм Илһамия Кәримова кул эшләре күргәзмәсен җәелдереп җибәргәннәр.
Мәчәләй авылының “Ак калфак” оешмасында барлыгы биш кенә кеше, ләкин активлыклары белән барысын да уздыралар. Ерак араны якын итеп чарага килгән олы яшьтәге Җәүһәрия апа Бәхтиева Мәүлид бәйрәменә атап чиккән кулъяулыклары турында: “Күп чиктек инде кулъяулыкларны, күп. Без яшь чакта Мәчәләйдән армиягә кырыклап егет китә иде. Берсен дә үпкәләтмәс өчен, һәрберебез китүчеләр санында кулъяулык чигеп куя идек”, — дип үзенең аллы-гөлле кул эшләрен күрсәтте. - Әниебез безне челтәр бәйләргә дә, чигәргә-тегәргә дә өйрәтте. Кеше эшли алмаган эш юк дөньяда, дип әйтә иде, мәрхүмә”.
Яңа елга яисә туган көннәргә бүләк алам дигән кешеләр дә бәйрәмнән буш кул белән китмәделәр, Лилия һәм Әлфия Сөләймановалар үз куллары белән ясаган бүләкләрне – челтәрле агач тартмаларга салынган сыйфатлы чәйләрне һәм сувенирларны сатып алучылар да күп булды. Үзешчән рәссамнарыбыз Тәслимә Мостафина һәм Азат Надировларның күргәзмәләре дә бай һәм матур иде. Берәрсенең юбилеена яисә өеңне бизәү өчен картина сатып алсаң, бик шәп бит ул.
Менә халык залга кереп бетте. Сәхнәгә “Дуслык” оешмасы президенты киңәшчесе Идеал Галәүтдинов чыгып халыкны бәйрәм белән котлады һәм Мөхәммәт пәйгамбәр (с.г.в.с)нең тууыннан башлап ахыргы көненә кадәр кылган изге гамәлләре турында сөйләде. Региональ Диния нәзарәте рәисе, мөфти Талип хәзрәт Яруллин да, өлкә “Дуслык” иҗади-иҗтимагый оешмасы президенты, Бөтендөнья татар конгрессы президиумы әгъзасы Фәхретдин Канюкаев та изге теләкләрен җиткерделәр.
- Мәүлид ән-Нәби мөселманнар өчен бик зур бәйрәм, - диде Фәхретдин Бәдретдин улы. — Самара татарлары аны күркәм итеп үткәрсен өчен, Казаннан артистлар чакырдык, балалар да бик әзерләнделәр. Шушы залларны тутырып килүегез өчен рәхмәт.
Региональ Диния нәзарәте рәисе, мөфти Талип хәзрәт Яруллин Коръән сүрәләре укыганнан соң халык аягүрә басып Аллаһы Тәгаләгә салаватлар әйтте, ахырда мөфти хәзрәт шушы чараны оештыручы Идеал Галәүтдиновка һәм мәчеткә һәрдаим ярдәм күрсәтеп торучы эшкуар Әнвәр Горлановка Рәхмәт хатлары тапшырды.
Өлкә губернаторы администрациясе җитәкчесе вазифаларын вакытлыча башкаручы Дмитрий Холин залда утыручыларга өлкә губернаторы вазифаларын башкаручы Дмитрий Азаровның котлауларын җиткергәннән соң, Самара татарлары тарихын барлаучы һәм язучы Шамил Хәйдәр улы Галимовны “Халыклар арасындагы дуслыкны ныгыту өчен” Самара өлкәсе губернаторының Мактау билгесе белән бүләкләде. Өлкәбездә мәчетләр төзү, рухи тәрбия бирү эшенә өлеш керткән бер төркем мөселманнарга – Раил Абушаев, Фоат Гарипов, Камил Исхаков, Әхмәткәрим Миңнекаев, Сабирҗан Насыйров һәм Гаяз Рәфыйковларга губернаторның Рәхмәт хатлары тапшырылды.
Мәүлид ән-Нәби бәйрәме мөнәҗәтләр, дини җырлар, төрле сәхнә күренешләре белән дәвам итте. Самараның Мәдәният институты студенты Розалия Хәкимова “Казаныма төннәр төшсә” җырын күңелләргә үтеп керердәй итеп башкарган вакытта Виктория Митрофанованың комнан ясалган Сөембикә-ханбикә сурәтләре зур экраннан күрсәтелеп торды.
“Яктылык” татар мәктәбе укучылары малай белән кызның беренче мәртәбә мәчеткә дин дәресенә бару күренешен сәхнәләштергәннәр. Ә җирле шагыйребез мәрхүм Марат Сафин һәм музыкант Әлфия Гыйниятуллина язган мөнәҗәт өченче сыйныф укучысы Әминә Канюкаева башкаруында челтерәп аккан чишмә тавышын хәтерләтте: “Күкләр әйтә Аллаһым диеп, Җирләр әйтә Аллаһым диеп, Сулар ага Аллаһым диеп, Лә илаһым, илләлаһым”…
Чара Казан кунаклары — Ильяс Халиковның «Мөнбәр» татар дини театрының Мәүлид бәйрәменә багышланган гыйбрәтле сәхнә күренешләре һәм җырлары белән тәмамланды.
Эльмира ШӘВӘЛИЕВА.
Автор фотосурәтләре.
КОНТЕКСТ:
С любовью к Пророку
Просмотров: 1151