Тар коллыкка баш имәгән керсез йөрәк

Татар халкының күренекле улы, Советлар Союзы Герое, Ленин премиясе лауреаты, каһарман шагыйрь Муса Җә­лилнең тууына быел 111 ел тула. Бу уңайдан газета уку­чыларыбыз өлкәбезнең мәк­тәпләрендә, Мәдәният йорт­ларында төрле чаралар узды­ры­лачагы турында хәбәр итәләр.

Похвистнево районының Гали авылы мәктәбе укытучысы Гөлчәчәк Таҗетдинова:

- Шагыйребезнең туган көнен ел саен билгеләп үтә­без. Быел әдәби кичә уздырырга булдык. Балалар белән аның иҗатына, тормыш юлына багышланган стена газетасы әзерләдек, кызыклы программа төзедек. Кичәдә шагыйрьнең шигырьләре, аның сүзләренә язылган җырлар яңгыраячак.

Камышлы районының Яңа Ярмәк авылы китапханәчесе Алисә Хаматшина:

- Авылыбызда Урта Азия­дән килеп урнашкан гаиләләр дә яши. Аларның балалары татар шагыйрьләрен бе­лергә тиеш, дип уйлыйм, һәм эшчәнлегемдә моңа зур әһә­мият бирәм. Мәдәният йорты җитәкчесе, мәктәп укытучылары белән бергәләшеп, балалар өчен Муса Җәлилнең туган көненә багышланган чара үткәрергә ниятлиләр. Шимбә көн түгәрәгендә балаларны шагыйрьнең сугыш чорында, әсирлектә язылган шигырьләре белән таныштырдым. “Кызыл ромашка”, “Бү­реләр” әсәрләре укучыларда аеруча нык тәэсир калдырды.

Татарстанның атказанган укытучысы, Самараның “Як­тылык” татар мәктәбенең татар теле һәм әдәбияты укы­тучысы Нурзидә Фәйзул­лина:

- Каһарман шагыйрь Муса Җәлилнең шигырьләре туган илебезгә мәхәббәт хисе тәрбияләү белән беррәттән авыр чакларда бөгелеп төш­мәскә, кыенлыкларга би­решмәскә өнди, көчле булып калырга өйрәтә. Мәктәбебездә аның туган көненә багышлап барлык сыйныфларда сыйныфтан тыш чаралар да үткәреләчәк.

Укучыларыбыз Муса Җә­лилнең тормыш юлы һәм иҗаты белән бик яхшы таныш, нинди генә сорау бирсәң дә, дөрес җавап бирерләр, дип ышанам. Шулай да, аларны кызыксындырырлык мәгъ­лүматлар әле бар. Үзем укыткан сыйныфлар өчен кызык­лы викторина, презентация әзерләдем, шагыйрьнең шигырьләрен эчтәлекле уку буенча бәйге дә оештырырга ниятлим. Муса Җәлил — әсәрләре белән генә түгел, батырларча үлеме белән дә исемен мәңгеләштергән шагыйребез. Шуңа да аның туган көнен, юбилейлымы ул — юкмы, билгеләп үтмәскә хакыбыз юк.

Язманы Әминә ШИҺАПОВА әзерләде.

 

Соңгы җыр

Җир йөзе шундый киң,

Күңелле һәм якты!

Тик төрмәм караңгы,

Ишеге йозаклы!

Күктә бер кош оча

Югары, югары!

Мин ауныйм идәндә,

Кулларым богаулы.

Тышта бер гөл үсә

Яңгырга коенып;

Мин кибәм, мин сулам

Төрмәдә боегып.

Мин беләм: бик татлы

Да яшәү тойгысы!

Тик инде мин үләм,

Бу җырым — соңгысы!..

 

Яулык

Аерылганда миңа йөрәк

                                   дустым

Бүләк итте ефәк яулыгын;

Мин ярама яптым ул

                                   яулыкны

Басар өчен агышын

                             канымның.

Кан табыннан куе кызыл

                                  төстә

Яулык минем йөрәк турында,

Сөйли миңа аның җылы назы

Һәм ялкынлы сөюе турында.

Мин чикмәдем, дускай, бер

                               карыш та,

Батырларча алга атладым.

Яулык шаһит: сине һәм

                                    илемне

Йөрәк каным белән

                               сакладым.

«Бердәмлек».

 

Просмотров: 1712