Аллага шөкер, соңгы елларда эшли торган хатын-кызларның тормышы җиңеләйде. Эштән кайтышлый кулинария, икмәк пешерү кибетләренә кереп әзер салатлар, кабарып пешкән өчпочмаклар яисә татлы бәлешләр, ярымфабрикатлар сатып аласың да ирең, балаларың кайтуына менә дигән өстәл корып куясың. Ялгыз яшәүче ир-атларга, олыгайган әби-бабайларга да плитә янында озак маташырга кирәкми, әзерне микроволновкага тыгып алырга гына кала. Бу тәмле ризыкларны әзерләүче “тылсымлы” ярдәмчеләребезгә рәхмәт укый-укый калган вакытыбызны гаиләбезгә, балаларга багышлыйбыз.
Рәхмәт сүзләрен Самараның “Карусель” гипермаркетларының берсендә эшләүче Әнвәр Абделрәхимовка дә җиткерәсе килә. Кибетнең пыяла витринасы эчендә матур итеп туралган ит, маринадлы шашлык, ярымфабрикатлар күрсәгез, бу, һичшиксез, аның эше.
Әнвәр Җәүдәт улы Үзбәкстанның Ташкент шәһәрендә туып-үскән, җирле политехник институтның (хәзер ул Ташкентның химия технологияләре институты дип атала) “Азык-төлек продуктлары җитештерү технологиясе” факультетында технолог һөнәрен үзләштергән.
- Кулыма диплом алгач, Ташкент рестораннарының берсендә эшли башлаган идем. Ә 2008 елда гаиләбез Самарага күченде. Һөнәрем монда да кирәк булып чыкты. Дөрес, берәр ел чамасы Мәскәүнең итальян ресторанында эшләп тәҗрибә тупладым. Хәзер инде Самараның “Х5 Retail Group” компаниясе кибетләрендә эшлим, — дип сөйләде милләттәшебез.
Әнвәрнең эш көне бик иртә башлана. Ул чималның сыйфатын тикшереп, әйбәтләп турап, сатуга әзерләп куя. “Әзерли” дип әйтүе генә җиңел. Моның өчен итне эшкәртү технологиясен белеп, түшкәнең кайсы җиреннән нинди продукция чыгасын күреп эшләргә кирәк.
- Мәсәлән, бәрән итенең калак сөяге янындагы иттән пылау пешерергә яхшы. Билдәмәсе — шашлыкка, сөяктәге ит — фаршка китә. Түшен аерым сатабыз. Бәрән аягын үләннәр белән озак кына маринадлап, фольгага төреп пешерсәң, бигрәк тә тәмле була. Кайбер хуҗабикәләр сөякле ит яратмыйм, дип сум ит кенә сатып ала. Ә бит сөяк салып пешергән аштан да тәмлерәк нәрсә юк, — дип һөнәр серләре белән уртаклаша милләттәшебез. Вакыты булганда, зур бәйрәмнәргә өстәл әзерләгәндә, хатыны Равиләгә дә булыша ул. Сигезенче сыйныфта укучы кызлары Мәдинә дә аш-суга оста булып үсә.
Абделрәхимовлар татар телен яхшы беләләр, ураза тоталар, дини бәйрәмнәрне зурлап уздыралар. Гомумән, милли гореф-гадәтләребез буенча яшиләр. Шуңа да Әнвәр үзе эшләгән кибеттә хәләл ит сатылмавына борчыла.
- Моңардан хуҗалар отар иде, әлбәттә. Шәһәребездә мөселманнар саны арта бит. Кибет җитәкчелеге сатып алучылар санын арттыру өчен башка юл белән бара — итне оригинал рецептура буенча югары сыйфат стандартларына туры китереп әзерлибез, ассортиментны да һәрвакыт үзгәртеп торабыз. Продукциягә вакыт-вакыт ташламалар ясау да халыкны җәлеп итә. Акцияләр вакытында ит продукциясе базардагыга караганда күпкә арзанрак була. Бу пенсионерларга, студентларга бик уңай. Алар күбрәк тавык итеннән әзерләнгән ярымфабрикатлар сатып алалар. Бәясе арзан бит аның, — ди ул.
Уңган, тырыш милләттәшебез турында хезмәттәшләре дә яхшы фикердә.
- Әнвәр Җәүдәт улын күптән беләм. Ул чын профессионал, бөтен эшне җиренә җиткереп эшли. Ял көннәрендә дә өйдә тик ятмый, икенче җирдә эшләп, гаилә бюджетын тулыландыра. Хезмәтебезнең үзенчәлеген белгән кеше генә моның никадәр авыр булуын аңлый. Көнозын аяк өстендә, көне буе ит турыйсың... — дип сөйли шеф-повар Руслан Хәмәдиев.
Әйе, азык-төлек тармагында эшләүче бер һөнәр иясенең дә хезмәте җиңел түгелдер. Аеруча бәйрәмнәр алдыннан эшләре күп аларның. Әнвәр Абделрәхимов кебек өстәлләребез мул, аш-суларыбыз тәмле булсын өчен тырышучы меңләгән “тылсымчы”ларны профессиональ бәйрәмнәре белән котлап, аяк-кулларының сызлаусын булуын телибез.
Алия АРСЛАНОВА.
Просмотров: 1001