Самара өлкәсенең хатын-кызлар берлеге инициативасы белән ел саен “Ел хатын-кызы” номинантларын бүләкләү чарасы уздырыла. Быел бу бүләккә 50 хатын-кыз лаек булды. Бүләкләнүчеләр арасында иҗтимагый эш белән шөгыльләнүчеләр һәм финансистлар, табиблар һәм укытучылар, җирлек башлыклары һәм хәрбиләр… Аларның һәрберсе үз өлкәсендә уңышлы эшләүче профессионаллар һәм, шул ук вакытта, аналар, әбиләр, сөекле хатыннар да…
Губернатор Дмитрий Азаров хатын-кызларны котлап, туган ягыбызны һәм якташларыбызны яратулары өчен рәхмәт белдерде. “Өлкәбез эзлекле рәвештә үссен өчен сез бик күп эшлисез, бездән алда яшәгән буыннар туплаган белемне, тәҗрибәне кадерләп саклап, шуңа нигезләнеп алга атлыйсыз. Сезнең хезмәтегез, җаваплы булуыгыз, яхшылыгыгыз белән сокланам. Тормышыбызны көннән-көн яхшыртып торуыгыз өчен рәхмәтләремне белдерәм”, — диде.
Менә бит, безгә, хатын-кызларга, күп тә кирәкми, губернаторның игътибары һәм җылы тәбрикләве дә йөрәкләребезгә май булып ята. Хатын-кызларга шундый зур бәя бирүе үзе ни тора! Бу сүзләр барыбызга да тагын да җаваплырак булырга, тырышыбрак эшләргә этәргеч булачак, дип уйлыйм.
Җыелышта татар һәм башкорт милләтендәге хатын-кызлар да бар иде — Таисә Галәүтдинова, Наилә Тимербулатова, Гүзәл Сафина, Сәлимә Краснова-Игенбетова, Рәүдә Шәймарданова, Розалия Абҗәлимова һәм мин үзем. Шулай ук чарада мөфтиебез Талип хәзрәт Яруллин һәм “Прогресс-В” төзү компаниясе президенты Вазыйх Мөхәммәтшин да катнаштылар. Безне, татар хатын-кызларын, онытмаган өчен губернатор администрациясенә рәхмәтләребезне җиткерәбез.
Өлкә губернаторы Дмитрий Азаров 8 Март бәйрәме белән дә тәбрикләп, барыбызга да исәнлек-саулык, гаилә бәхете, мәхәббәт һәм күңел тынычлыгы теләде.
“Ак-калфак” өлкә хатын-кызлары оешмасы җитәкчесе буларак, мин дә губернаторның тәбрикләүләренә кушылып, хатын-кызларыбызга иң җылы теләкләремне җиткерәм.
Разия ӘЮПОВА.
Просмотров: 1075