Хатын-кызларга багышланган бәйрәм уңаеннан Яңа Ярмәк авылы клубында музыкаль кичә уздырылды.
Яз – безнең тыйнак тормышыбызга яңа көч, дәрт, омтылыш, ышанычлар алып килә торган вакыт. Яз күңелнең иң нечкә кылларына кагылып утә, иркәли, дөньяга-яшәешкә өмет сулышы өрә, яхшылыкка өнди. Яз табигатькә тереклек алып килгән кебек, хатын-кызлар да җиргә яңа тормыш бүләк итә. Шагыйрьләр, рәссамнәр хатын-кызга карата мәхәббәт һәм рәхмәт хисләрен белдерү өчен иң назлы сүзне, иң ачык төсне тапканнар, тылсымлы планеталарга һәм күңелне жилкендереп янучы йолдызларга алар исемен биргәннәр.
Хатын-кызларга багышланган бәйрәм уңаеннан без дә авыл клубына җыелдык. Биредә зур концерт оештырылган иде. Исаклыдан кайткан җырчыларыбыз Флюра апай Хәлиуллина белән Александр Мамонов безгә матур җырларын бүләк иттеләр. Александр Владимирович рус егете булса да, татарча җырларны да бик моңлы итеп башкарды, русча җырлары да тамашачыларны дәртләндерде. Башкаручыларның дәртле җырларына хәтта тамашачылар да биергә чыктылар.
Шулай итеп матур-матур җырлар җырланды, биюләр биелде. Авылыбызның һәвәскәр артистлары да концертта чыгышлар ясадылар. Гөлчәчәк Гыймаева, Рәмзия Мифтахова, Гөлсинур Гафурова, Юлия Шакирова матур җырлар әзерләгәннәр иде. Биюче кызларыбыз Ләйсән Фәйзуллина, Юлия Шакирова, Алисә Госаинова, Ираида Шәйхетдинова, Аделина Хәмидуллина төрле-төрле биюләре белән тамашачыларны куандырдылар. Кызык күренешләрдә Тамара Хәмәдиева, Рузалия Гафурова, Асия Җәләева, Гөлчәчәк Гыймаева катнаштылар. Бишенче сыйныф кызлары да әниләргә багышлап җыр башкардылар.
Бәйрәм кичәбез сый тулы өстәлләр тирәли дәвам итте. Хатын-кызларыбыз музыкаль тамашадан күтәренке күңел белән таралыштылар, Исаклыдан кайткан җырчы кунакларга аеруча рәхмәтле калдылар, тагын концерт белән килүләрен соралдылар.
Хөрмәтле әниләр, әбиләр, апалар, сеңелләр! Ихлас күңелемнән сезгә тазалык-саулык, ак бәхетләр, язгы кояштай ягымлылык, сөйкемлелек, күңелләрегезгә яз җилләредәй җылылык, мәрхәмәтлелек, сабырлык, гаиләләрегезгә тынычлык, тигезлек, иминлек, тормышыгызда, эшләрегездә зур уңышлар, барлык хыял-теләкләрегезнең тормышка ашуын теләп калам. Балаларыгызның, якыннарыгызның игелеген күреп, мәхәббәтен тоеп яшәргә язсын. Йөзләрегез һәрчак шатлыктан балкып торсын. Бәйрәм белән сезне, хөрмәтле хатын-кызларыбыз!
Яңа Ярмәк авылының клуб мөдире А.Г.ХӘМИДУЛЛИНА.
Камышлы районы.
Просмотров: 980