Исеме мәңгеләштерелерме?

Александр МЕДВЕДЕВ (сулдан уңга), Петр КАБЫТОВ, Усман ИЛИНГИН, Шамил ГАЛИМОВ һәм Александр БЕЙЛИН.

Александр МЕДВЕДЕВ (сулдан уңга), Петр КАБЫТОВ, Усман ИЛИНГИН, Шамил ГАЛИМОВ һәм Александр БЕЙЛИН.

Моннан берничә ел элек шәһәребездә өлкә татар мил­ли-мәдәни автономиясе “Самара төбәге тарихында татар исемнәре һәм вакыйгалар” проектын тормышка ашыра башлап, танылган татарлар яшәгән йорт, татар мәктәпләре, татар-башкорт педагогия училищесы, матбугат йорты диварларына истәлек такталары урнаштырылган иде.

Ә менә “Куйбышевнефть” берләшмәсенең баш геологы булып эшләгән, Социалис­тик хезмәт герое, ике тапкыр СССР Дәүләт премиясе лауреаты Әхмәт Нурмөхәммәт улы Мостафинов 1942 — 1952 елларда яшәгән Ленинградский урамының 72 санлы йортына истәлек тактасы куеп булмый әлегә.

- Аның проекты күптән әзер, шәһәр Думасы тарафыннан да хупланган. “Гражданнар Кодексы”ның өлешле милектә булган мал-мөлкәттән файдалану статьясы буенча, такта кую алдыннан, йортта яшәүче һәркемнең ризалыгын алырга кирәк. Ә халык моңа каршы чыкты. Әлеге өстәмә “Граждан­нар Кодексы”на күп­тән тү­гел генә кертелгән. Әле ярый берничә тактаны элеп өл­гердек, — дип сөйли тарихчы, истәлек такталарын элү эшләрен башлап йөрүче һәм га­мәлгә кертүче өлкә татар мил­ли-мәдәни автономиясе рәи­се урынбасары Шамил Галимов.

Шушы көннәрдә Әхмәт Мос­тафинов истәлегенә мемориаль такта элү буенча инициатив төркем  Ленинградский ура­мындагы 72 санлы йортта яшәүчеләр белән очрашып сөйләштеләр. Җыелышта Самарский районы депутатлары Усман Илингин һәм Александр Медведев, тарих фәннәре докторы, профессор, Самара университетының Россия тарихы кафедрасы мөдире Петр Кабытов та катнаштылар. Шамил Галимов чараны Әхмәт Мос­тафиновның биографиясе, илебезгә күрсәткән хезмәте белән таныштырудан башлап җибәрде.

- Биредә шундый олы кеше яшәгән һәм без моңа шат. Бу йорт 1934 — 1936 елларда шәһәрнең  иҗади элитасы өчен махсус төзелгән булган. Күргәнегезчә, аның диварында “Белгечләр йорты” дип язылган. Йортның һәр фатирында диярлек дәрәҗәле исемнәргә лаек булган кешеләр яшәгән, - дип сөйләде Александр Бейлин, һәм сүзен дәлилләп, зур исемлек күрсәтте. - Ни өчен бер кешегә генә такта куелырга тиеш? Әйдәгез, барысының да исемнәрен мәңгеләштерик.

- Һәйкәл яисә мемориаль такта кую өчен инициатив төркем булдырып, шәһәр администрациясенә тәкъдим белән чыгарга кирәк. Сездән андый тәкъдим килгәне булмады. Әгәр бу йортта яшәгән кешеләрнең исемнәрен мәң­ге­ләштерергә телисез икән, без бик теләп ярдәм итә­чәкбез. Әхмәт Мостафинов та алар рәтендә бит, аның истәлегенә мемориаль такта куйсак, бик әйбәт булачак. Инде бөтен язулар, килешүләр дә бар, бары тик сезнең ризалык кына кирәк, - дип сөйләде  Александр Медведев. Усман Илингин һәм Петр Кабытов та, чыгыш ясап, бу изге гамәл шәһәребез горурлыгы булуын белдерделәр.

Александр МЕДВЕДЕВ (сулдан уңга), Петр КАБЫТОВ, Усман ИЛИНГИН, Шамил ГАЛИМОВ һәм Александр БЕЙЛИН.

Александр МЕДВЕДЕВ (сулдан уңга), Петр КАБЫТОВ, Усман ИЛИНГИН, Шамил ГАЛИМОВ һәм Александр БЕЙЛИН.

Күпкатлы йорт рәисе Лариса Носкова халыкның йортны һәм йорт алдын төзекләндерү буенча район администрациясенә берничә шарты булуын, алар үтәлгән очракта, такта куярга ризалык бирәчәкләрен белдерде. Александр Викторович, аны һәм йорт активистларын очрашуга чакырып, бу мәсьәләләрне уртага салып сөйләшергә тәкъ­дим итте.

Әмма җыелган халыкның кү­бесе моның белән генә ка­нә­­гатьләнмәде, Александр Бей­лин кебек: “Бер кешегә ге­нә такта куярга ризалык бир­­мәячәкбез, барысының да исем­нәрен мәң­геләштерергә ки­рәк”, — дию­че­ләр шактый булды.

Шамил Галимов бу тәкъдим белән килешеп, йорт каршына танылган кешеләр исемлеге язылган стелла сыман бер корылма куярга була, дип белдерде. Нәтиҗәдә, Әхмәт Мостафинов истәлегенә мемориаль такта кую гамәле бүгенге көнгә хәл ителмичә калды. Бәлки депутатлар белән очрашып сөй­ләшү халыкның фикерен үзгәртә алыр.

Алия АРСЛАНОВА.

«Бердәмлек»

Просмотров: 1130

Комментирование запрещено