24 апрельдә Таһир Гобәйдулла улы һәм Наилә Мөхәммәтсафа кызы Мамышевларның бергә яшәүләренә 70 ел тулды.
Таһир Мамышев һәм Наилә Мостафина 1947 елда, Камышлы педагогия училищесенда укыганда танышалар. Аннары егет дүрт ел армиядә хезмәт итә, ә кыз аны көтә. Өйләнешкәч тә Таһирны көтәргә туры килә аңа. Ире, офицер буларак, гарнизоннан гарнизонга күчеп йөри. Туу турындагы таныклыкларына карасаң, балаларының төрле җирләрдә тууларын күрәсең.
Таһир 30 ел гомерен илне саклауга багышлый. Отставкага чыккач та, тик ятмый, Наилә белән бергәләп космос сәнәгатендә бик җаваплы эштә эшлиләр. Таһир Гобәйдулла улы унлап орден-медальләр белән бүләкләнгән. Иң кадерлесе, әлбәттә, “Кызыл Йолдыз” ордены.
Лаеклы ялга чыккач, Таһир Гобәйдулла улы мәчеткә йөри башлый, 1997 елда аңа хаҗ гамәлен кылырга насыйп була, Коръән-Кәримне укырга өйрәнә, Наилә апа да намазларын калдырмый. Менә шулай матур гына, бер-берсен яратып, балалары рәхмәтенә, милләттәшләре хөрмәтенә төренеп яшиләр алар.
Таһир һәм Наилә Мамышевларны “Изге” дип аталган 70 еллык гаилә бәйрәме белән чын күңелдән котлыйбыз. Исән булыгыз, күзләрегездә сөю нуры сүнмәсен, яшәү дәрте сүрелмәсен!
Татар иҗтимагый оешмалары исеменнән “Бердәмлек” газетасы редакциясе.
Просмотров: 978