9 Май – Россия халкы өчен иң кадерле бәйрәм. Чөнки сугыштан җиңү белән кайткан яисә яу кырында ятып калган Бөек Ватан сугышы герое һәр гаиләдә дә бар. Бөек Җиңү көне — бердәмлегебезне, Ватаныбызны өзелеп сөюебезне күрсәтә торган бәйрәм ул. Камышлы районының Иске Ярмәк авылында үткәрелгән 77нче Җиңү көне быел аеруча тантаналы һәм якты, шул ук вакытта күңелләргә үтеп керердәй дулкынландыргыч булып узды.
Авыл җирлегендә үткән Үлемсез полк йөреше, шәһәрнеке кебек күләмле булмаса да, фотосурәтләрдәге һәр кешенең исем-фамилиясе, сугыш һәм хезмәт юлы, батырлыгы бөтен авылдашларга да билгеле булуы белән алдыра. Күтәреп барган портретлардан авыл тарихы карап тора сыман. Школьная, Центральная, Спортивная урамнары аша үтеп, авыл уртасындагы монументка барып җиткән стройда яше дә, карты да бар иде. Колонна башында, байрак тотып, “Лидер” хәрби-патриотик клубы әгъзалары атлыйлар. Күпсанлы тамашачыларда бу күренеш искиткеч горурлык, шатлык, соклану хисләре уятты. Хәтта олы яшьтәге апа-абыйларның күзләреннән яшь бөртекләре дә тәгәрәп төште.
Үлемсез полкта катнашучылар сугыш корбаннарына куелган һәйкәлне уратып алырга өлгермәделәр, “Ак каен” халык фольклор ансамбле чыгышы башланды. Бу юлы үзешчән артистлар 1941 елның 22 июнь көнен сәхнәләштергәннәр. Камышлыда Сабантуе барганда килгән сугыш хәбәре йөрәкләрне өтеп алгандай була. В.Молотовның «Сегодня… без объявления войны… Победа будет за нами! Враг будет разбит!» дигән сүзләре йөрәкләрдә патриотизм факеллары кабыза…
Митинг Россия гимны һәм җирлек башлыгы Минсәгыйть Шәйхетдиновның чыгышы белән башланып китте һәм Камышлы районы башлыгы урынбасары Руслан Сәлахов, армия ветераннары Салават Минһаҗев, Рәхимҗан Абдулин котлаулары белән тәмамланды. Мәктәп укучылары Азалия Ибраһимова, Валерия Горбунова, Ильвина Гайфуллина, Розалина Кәримова башкарган шигырьләр истәлекле сүзләр генә булып калмады, Россиягә каршы сугыш белән килергә теләүчеләрне кисәтеп чаң кагу булып яңгырады.
…Ә сәхнәдә инде яңа күренеш: сугыш тәмамланган, авыл сугыш батырларын каршылый. Ләкин яуга китүчеләрнең яртысы гаиләсе кочагына кайтып егыла алмаган, туган авылы, Ватаны өчен гомерен биргән… Дан һәм хөрмәт аларга! Ә сугыштан кайтучыларны тальян гармуннары, “Ярмәк вагы” белән каршы алалар.
Беразга гына тынып торган татар көен ярып, “Лидер” хәрби-патриотик клубында шөгыльләнүче яшьләр түгәрәккә чыктылар һәм клубта өйрәнгәннәрен халыкка күрсәттеләр. Бу чыгыш үзенә күрә аерым бер парад кебек үтте. Ә “сугыштан кайтучылар” аларга Җиңү байрагын тапшырдылар. Бу да бик дулкынландыргыч алым иде…
Сугыш кырларында ятып калучылар истәлегенә бер минут тынлык, һәйкәл итәгенә чәчәкләр кую тантанасыннан соң, авылдашлар Иске Ярмәк авылы Мәдәният йортында бәйрәм концерты карадылар. Хөрмәтле кунаклар өчен чәй өстәле дә әзерләнгән иде.
Бу көнне читтә яшәүче күп авылдашларыбызны да очратырга насыйп булды. Алар балаларын, оныкларын да ияртеп кайтканнар. Шул минутта башымнан бер фикер йөгереп узды: “Бүген аларның биредә булуы бик яхшы бит. Сугышның нәрсә икәнлеген белмәгән балалар авылы, иле тарихына кереп чумдылар. Сугыш тәмамлануга 77 ел үткән, күп нәрсәләр, күп исемнәр онытылып бара. Ә мондый чаралар оныкларны кырыс чынбарлыкка кайтара, күңелләрендә сугышка карата иммунитет эшләп чыгарырга ярдәм итә, әлбәттә. Киләчәк буын кешеләре дә, безнең кебек үк: “Без хәтерлибез! Без горурланабыз! Без хөрмәт итәбез!” — дип әйтсеннәр иде.
Шундый ук үтемле һәм тантаналы чаралар Ярмәк җирлегенә караган Яңа Ярмәк һәм Чулпан авылларында да узды.
Лилия СӘЛӘХОВА.
Иске Ярмәк авылы, Камышлы районы.
Просмотров: 814