Идеал Галәүтдинов Бикүле авылы мәктәбендә очрашу вакытында.
Татарстанның Нурлат районы мәктәпләрендә хәрби-патриотик айлык кысаларында мәдәни чаралар дәвам итә. Шундыйларның берсе күптән түгел Бикүле авылы мәктәбендә булып үтте.
Биредә ел саен сугыш һәм тыл ветераннары белән очрашу рәвешендә үткәрелүче бу чара быел бүгенге көндә Самара шәһәрендә гомер итүче авылдашлары, запастагы полковник Идеал Галәүтдиновның тәкъдиме буенча үзенчәлекле форматта уздырылды.
“Бабаларым һәм әбиләремнең сугышчан һәм хезмәт бүләкләре нәрсә турында сөйли?» дип аталган бу акция укучыларда зур кызыксыну уяткан һәм әлеге сорауга җавап эзләп, алар бик зур эш башкарганнар. Бөек Ватан сугышында катнашкан бабалары, тылда тырыш хезмәт куйган әбиләре турында бай мәгълүмат тупланган, орден-медальләре барланган, китапханәләрдән һәм Интернет чыганакларыннан өстәмә материаллар җыелган. Сыйныфларда сайлап алу турын үткән балаларга әлеге эшләрен мәктәп күләмендә тәкъдим итү хокукы бирелгән.
15 февральдә — Совет гаскәрләрен Әфганстаннан чыгару көнендә мәктәпнең көтеп алынган кунагы Идеал Галәүтдинов, районның хәрби комиссары Заһир Абдуллин, авыл җирлеге башлыгы Рияз Садыйков катнашында үткән бу чарада катнашучыларның һәркайсы үз эшләрен компьютер ярдәмендә тулыландырып, чыгыш ясады.
Идеал Галәүтдинов Бикүле авылы мәктәбендә очрашу вакытында.
Укучыларның темага җитди якын килүе күренеп тора иде. Мәсәлән, конкурс нәтиҗәләре буенча беренче урынга лаек дип табылган Ләйсән Латыйпова сугышта катнашкан ике бабасы Галиулла Вәлиуллин белән Салих Латыйпов, аларның сугышчан бүләкләре турында кызыклы итеп сөйләде.
Кемдер исә сугыш ветераннары булган әби-бабаларыннан тыш, бүгенге көн батырлары — Әфган сугышын кичкән әтиләре, Чернобыль афәтләрен ликвидацияләүдә катнашкан якыннары турында сөйләүне кирәк дип тапкан. Идеал Галәүтдиновның үзенең дә укучыларга җиткерер сүзе бар иде.
- Минем әтием Муса Галәүтдин улы үзенең 5 туганы белән шушы авылдан Бөек Ватан сугышына илне якларга чыгып киткән. Кызганыч ки, аның биш туганы да яуда ятып калган, әтием генә Сталинград сугышында каты яраланып, туган авылына әйләнеп кайта алган, — диде ул һәм укучыларга әтисенең рәсемен күрсәтеп, сугышчан бүләкләре хакында сөйләде.
30 елдан артык гомерен илнең Кораллы көчләренә хезмәткә багышлаган, Нурлат шәһәренең мактаулы гражданины Идеал Галәүтдинов “Бабаларым һәм әбиләремнең сугышчан һәм хезмәт бүләкләре нәрсә турында сөйли?” акциясе кысаларында үткәрелгән бу чарада һәм, гомумән, хәрби-патриотик хәрәкәттә актив катнашкан укучыларга “Ватан патриотлары” дигән истәлекле медальләр, китаплар һәм акчалата бүләкләр дә тапшырды. Чарага үзенчәлекле чыгышлар белән бай программа әзерләгән мәктәп коллективы, аны оештыруда ярдәм иткән авыл җирлегенең башкарма комитеты җитәкчесе Идеал Галәүтдиновка үзләре дә бүләк әзерләгәннәр иде. Аңа Бикүле авылы мәчете төшерелгән картина тапшырылды, һәм ул кадерле кунакка туган якларын гел хәтерләтеп торачак.
Ә якташыбызның матур башлангычы дәвамлы булырга охшаган.
- Бөтенроссия патриотик хәрәкәте кысаларында оештырылган бу акциягә Самара өлкәсенең татар мәктәпләре дә теләп кушылды. Алар да тиздән үзләренең эшләрен яшьтәшләренә тәкъдим итәчәкләр. Ә Татарстанның Нурлат районындагы Бикүле мәктәбеннән башланган бу чарага башка урыннарда да кушылсалар бик яхшы булыр иде. Ә мондый чаралар яшь буынның бабалары һәм әбиләре күрсәткән батырлыкларга битараф булмавы хакында сөйли бит, — ди танылган якташыбыз.
Лилия МӨБАРӘКШИНА.
Просмотров: 1499