Касыймовлар гаиләсе.
Алтын туй – еллар сынавына бирешмәгән олы мәхәббәтнең чагылышы ул. Ярты гасыр гомер бергә яшәү өчен кешеләргә күпме сабырлык, түземлек, акыл, өмет-ышаныч кирәк. Мәчәләй авылында яшәүче Сафия һәм Сәйфулла Касыймовлар гаиләсе инде 50 ел бергә иңне-иңгә куеп матур гомер кичерә. Үткәннәре гыйбрәтле, бүгенге көннәре бәхетле, киләчәкләре өметле аларның.
Сәйфулла җизни белән тормыш корып җибәргәндә апам Сафиягә 18 яшь кенә иде әле. Кияү йортында аны үз балаларыдай кабул иттеләр, кайнана белән килен тиз арада уртак тел табып, бер-берсен хөрмәт итеп яши башладылар. Апам белән җизнәмнең беренче уллары Рөстәм дә шунда — төп йортта туды. Аннан яшьләр, үзләренә йорт салып, аерылып чыктылар. Икесе дә ишле гаиләдән булгангамы, туганнарым күп бала турында хыяллана иделәр һәм бер-бер артлы тагын ике малай алып кайттылар. Шулай итеп, Касыймовлар гаиләсе зурайды. Апама җиңел булмагандыр, әлбәттә. Балалар да үстер, йорт эшләрен дә алып бар. Әле колхозда җәен чөгендер утарга, урып-җыю вакытында келәтләр янында эшләргә дә өлгерә иде Сафия апа. Ул вакытларда балалар бакчасы юк иде. Сабыйларын иртән әниләргә китереп куя, кич белән килеп ала. Ә җизни колхозда 45 ел буе шофер булып эшләп, һәрвакыт мактау сүзләренә генә лаек булды.
Аларның уллары да үзләре кебек хезмәт сөючән, ярдәмчел булып үстеләр. Өчесе дә Ватан алдындагы бурычларын үтәп, өлкәне — Себердә, уртанчысы Польшада хезмәт итте. Ә төпчегенең “кайнар нокта”га — Чечняга җибәрелүе билгеле булгач, кайгыдан Сафия апамның чәчләре агарды, кан басымы еш күтәрелеп яфалады. Бүген дә ул бу турыда тыныч кына, еламыйча сөйли алмый. Аллаһыга шөкер, туганыбыз, күкрәгенә Жуков исемендәге медаль тагып, исән-сау әйләнеп кайтты.
Касыймовлар гаиләсе.
Бүген апам белән җизнәмнең тормышлары тыныч, һәр яклап түгәрәк. Мал-туар асрыйлар, бакчада җиләк-җимеш, яшелчә үстерәләр. Сәйфулла абый мәчеткә дә йөри. “Вакытның узганы сизелмәде дә — 50 ел 50 көн кебек үткән дә киткән. Аллага шөкер, тигез яшәдек, нәсел агачын дәвам итеп, акыллы-тәүфыйклы уллар үстердек. Ходай гомерне бирсә, тагын яшәр идек әле. Тормышлар бик яхшы, бик рәхәт бит хәзер”, — диләр алар. Балалары Тольятти шәһәрендә үз тормышлары белән яшиләр, әти-әниләренә берсеннән-берсе матур 5 онык бүләк иттеләр. Чәчәкләр үстерергә яраткан апам һәр оныгына атап җимеш агачлары, гөлләр утыртты. Шуларга карап сокланган саен: “Сезнең тормыш шушы чәчәкләр кебек матур бит”, — диясе килә.
Хөрмәтле Сәйфулла җизнәм һәм Сафия апам! Сез никахка кергән көннән бирле 50 ел гомер үтеп киткән. Шул дәвердә күпме юллар үттегез дә, күпме сулар кичтегез, тормышны да бер мактадыгыз, бер сүктегез сез. Авыр мизгелләрдә бер-берегезгә терәк, бер-берегезгә кирәк булып, җан җылысын тоеп, тормышка гашыйк булып, шатланып яши беләсез. Киләчәктә барлык хыял-өметләрегез, уй-ниятләрегез кабул булсын, Ходай сезгә озын гомер, ныклы сәламәтлек бирсен.
Әлфия ИСМӘГЫЙЛОВА.
Мәчәләй авылы,
Похвистнево районы.
Просмотров: 1459
Поздравляем!!!
Сезга саулык хам бахт телим