Урам бәйрәме денислеләрне берләштерде

Дениснең мәдәният һәм китапханә хезмәткәрләре авылдашлары өчен онытылмаслык матур чара оештырды. Җәйнең бер гүзәл көнендә биредә «Яшь чакта салган эзләр буйлап» дип исемләнгән Әсхәт урамы бәйрәме узды. Чарага авылдашлар, урамдашлар, туганнар, якташлар кайтты. Бөтен кунаклар да безнең өчен якын һәм кадерле булды.

Бәйрәмебезнең хәерле үтүен һәм илебезгә тынычлык теләп, шулай ук бакыйлыкка күчкән авылдашларыбыз рухына багышлап, Рамил бабай Сабитов Коръән сүрәләре укып, дога кылып, чараны ачып җибәрде. Аннан соң котлау сүзе белән авыл советы хакимияте башлыгы Рәсим Сәйфулла улы Гаффаров чыгыш ясады. Бәйрәмне җыр-моңга күмеп, авыл мәдәният йортында эшләп килгән «Ак яулыклар» ансамбле матур тамаша кылды.

Урамның тарихы белән шушы урамда туып-үскән Фәүзия әби Хәлитова, Мөдәрис бабай Әбелхәеров, Рәмил бабай Сабитов  таныштырдылар.

Авылга газ керә башлагач, бөтен урамнарга да исемнәр бирелде. Тыкрык урамы белән Аргы як урамнары берләшеп, яңа урам биредә туып-үскән, Афган сугышында һәлак булган Әсхәт Саитбатталов исемен йөртә башлады.

Китапханәче Гүзәлия Марат кызы авылдашыбыз Әсхәт Рәфкать улы Сәетбатталовның биографиясен, аның хөрмәтенә бер урам аталуын, мәктәптә мемориаль такта ачылуын һәм музейда сугышчы почмагы булуы турында сөйләде. Әсхәт Рәфкать улының сыйныфташы, хезмәттәше Рәсим Вәсил улы Хәбибуллин үзенең дустын искә алып, укыган вакытлары, хәрби хезмәткә бергә алынып, анда үткән айлар турында сөйләде.

Быел Бөек Җиңүнең 80 еллыгы дип игълан ителү сәбәпле, Бөек Ватан сугышында катнашкан, шушы урамда яшәгән бабайларны да искә алып үттек. Чарага СВОда катнашучыларның әти-әниләре һәм туганнары да чакырылды. Китапханәче тарафыннан «Герои СВО — защитники России» күргәзмәсе оештырылды.

Туган җиребезнең гүзәл, тылсымлы табигате, челтерәп аккан чишмәләре, алтын башаклы басу-кырлары белән дан тота авылыбыз. Әсхәт урамында төрле һөнәр ияләре яши. Районда гына түгел, өлкәбездә дә дан тоткан, илебез иминлеген ныгытуга, табыннарыбыз муллыгын баетуга армый-талмый өлеш кертүче, көнне-төнгә ялгап фидакәр хезмәт куючы нык ихтыярлы игенчеләр, механизаторлар, шоферлар һәм терлекчеләр яшәвен, бу урам укытучыларга да бай булуын алып баручы исемләп әйтеп үтте.

Бу елда юбилейларын каршылаучыларны котлап, музыкаль бүләкләр тапшырылды. Бәйрәм кичәбез җырлар, биюләр, шигырьләр белән үрелеп барды. Әхәт Сәетбатталов туган авылы турында үзе язган шигырен укыды. Аның шигыренә Светлана Шәрипова музыка язган. Ир-атка гына хас булган моңлы тавышы белән Әхәтнең җырлавын күпләр беренче тапкыр ишеткәндер. Гармун күрекләрен тартып җырлаган Рәмилә апаның, Гөлкәй Әбелхәерованың, Әкълимә апай Йосыпованың, Зөмәрә апай Әбелхәерованың, апалы-сеңелле Рузалия һәм Гүзәлнең җырлары күңелләргә хуш килде, Гөлнур апай Морозованың шигыре озакка истә калыр.

Урамдашлар балачакка кайтып, килен булып төшкән чаклары, кызыклы хәтирәләре белән уртаклаштылар. Өлкәннәр һәм балалар өчен кызыклы уеннар оештырылды.

Кунакчыл халык учак яккан, казан аскан, самавырын кайнаткан иде. Бәйрәм өстәленә Гаффаров Айдар, Адигамова Фәридә бик тәмле итеп пылау пешерделәр. Бәйрәм Әсхәт урамында яшәүчеләр оештырган мул табынлы өстәл артында дәвам итте.

Җыр-моңга бай авылдашларыбыз белән очрашуда барлык борчу-мәшәкатьләрне онытып, бергә күңел ачып, яңа җырлар белән танышып, шулай ук элеккеләрен дә искә төшереп, рухи ял алдык.
Бер-беребез белән очрашып, туган авылыбызны, туган нигезебезне онытмыйча, бәхетле булып, мул тормышта, тыныч дөньяларда яшәсәк иде, дигән теләкләр белән таралдык.

Музыкаль һәм тәмле күчтәнәчләр белән кайткан кунакларга, чыгыш ясаган урамдашларга, гомумән, бәйрәмне үткәрүдә көче кергән һәммәсенә зур рәхмәтебезне белдерәбез. Киләчәктә дә сау-сәламәт булып, күңелле очрашулар-күрешүләр насыйп булсын.

Дениснең мәдәният һәм китапханә хезмәткәрләре.