Матур итеп татар халкының гореф-гадәтләрен саклап калу – буыннан буынга тапшырыла торган изге бурыч. Шул максаттан чыгып, Денис авылы мәдәният йортында узган чәй эчү мәҗлесе тарихка сәяхәт булды.
Әби-бабаларыбызның тормыш рәвеше күз алдына китерелде. Элек аштан аш өзмәгәннәр, халык дус-тату яшәгән. Идәнгә арт юрганнар җәеп утырып, «бисмилласын» әйтеп бер табактан аш, бер табадан бәлеш ашаганнар. Бер сөлгене үз алларына сузып, ахырдагы кешегә җитәме икән, дип борчылып, күршене кайгыртып яшәгәннәр.
Авылыбызның «Чулпан» фольклор төркеме әнә шул күренешне сәхнәләштерде. Кайсы бәлеш, кабартма, ипи, кәкере, кыймак – элек-электән нинди ризыклар белән кунак сыйлаганнар, шуларны әзерләп килеп, милли эс киемнәре киеп, бергәләшеп бик күңелле итеп, татар халкының бер йоласын күрсәттеләр.
Бу кичә милли рух белән сугарылган, татар халкының бай мирасын саклау һәм киләчәк буыннарга тапшыру максатын күздә тоткан әһәмиятле чара булды.
Киләчәктә әби-бабалардан калган гадәтләрне онытмый, йолаларны саклап, сау-сәламәт бергә тату яшәргә насыйп булсын. Мондый чараларны ешрак үткәреп, милли гореф-гадәтләребезне яңартып торыйк. Милли мәдәният – халыкның йөзе, аның рухи байлыгы.
Бүгенге кичә – шуның бер чагылышы. Ул безне берләштерде, рухыбызны күтәрде, татар булуыбыз белән горурланырга өйрәтте. Киләчәктә дә шундый ук игелекле эшләр кылырга язсын. Барыгызга да зур рәхмәт.
Денис авылы мәдәният йорты.
Шенталы районы.
Просмотров: 589