Көзләре дә була төрлечә:
Давыллап ала ул, бер тына.
Кеше гомерләре дә шулай:
Җылыта җаныңны, бер туңа.
Ачы да, төче дә язмышлар:
Сагышлар, ялгышлар, алкышлар.
Җаныңны өшеткән көзләре,
Өзәләр үзәкне сагышлар.
Җир шары түгәрәк, әйләнә.
Язлары бәйләнә көзләргә.
Бик кыска шул язлар гомере,
Моңсулык кертә ул йөзләргә.
Көзләрнең төсләре үзенчә,
Җир өсте күмелә алтынга.
Сап-сары яфраклар кырларны,
Әйтерсең, төргәннәр ялкынга.
Тик ялкын кермәсен җаннарга,
Сүнмәсен язларның хисләре.
Ал гөлләр атсыннар күңелдә,
Назласын җаннарны исләре.
Гөлсинур ГАФУРОВА.
Яңа Ярмәк авылы,
Камышлы районы.
Просмотров: 426