Январь урталарында Самараның Халыклар дуслыгы йортында 2016 елның 7 ноябрендә Хәтер парадында катнашучы татар милли хәрәкәте активистлары бүләкләнде. Таһир ага Байбековка, Асия ханым Шәймардановага, Рәйсә һәм Илдар Гыйбадуллиннарга, Ригил Курмаевка, Ринат Сафинга һәм Юлия Кәриповага өлкә татар милли-мәдәни автономиясенең башкарма директоры Шамил Галимов “Куйбышев — запас башкала” медальләрен тапшырды.
- Үсеп килүче буынны ватанпәрварлык рухында тәрбияләү, ветераннарга, тыл хезмәтчәннәренә хөрмәт күрсәтү уңаеннан уздырылган Хәтер парадында катнашуыгыз өчен чын күңелдән рәхмәт. Сез шәһәребездә үткән милли чараларда да актив катнашасыз. Милли хәрәкәт ветераннарына яшьләрнең дә кушылуы аеруча куандыра. Алар өлкән буыннан үрнәк алырлар, киләчәктә дә сынатмаслар, дип ышанасы килә, — диде Шамил Хәйдәр улы.
- 75 ел элек Куйбышев мәйданында үткән Хәтер парады тарихына кагылышым булуы белән чиксез горурланам, бүгенге бүләкне кадерләп саклармын, — дип хисләре белән уртаклашты Самараның социаль-педагогия училищесының 3нче курс студенты Юлия Кәрипова.
Алия АРСЛАНОВА.
Просмотров: 1017