Самараның «Яктылык» татар мәктәбендә, өлкәбезнең Гали, Денис, Балыклы авылларында Өлкәннәр көненә багышланган зур чаралар турында
Өлкәннәр көнен билгеләп үтү — өлкәбездәге иң матур традицияләрнең берсе. Бу көнне әби-бабайларга, олы яшьтәге апа-абыйларга аеруча зур игътибар күрсәтелә. Быел да, гомер көзенә кергән кешеләргә багышлап, өлкәбезнең барлык шәһәр-авылларында бәйрәм чаралары үткәрелде.
Самараның «Яктылык» татар мәктәбендә уздырылган чара турында хәбәрчебез Эльмира Шәвәлиева язды.
Бу мәктәптә Өлкәннәр көненә аеруча зур әһәмият бирелә. Быел хәтта 93 яшьлек сугыш ветераны Шакир ага Хәбибуллинны, мәчеткә йөрүче хезмәт ветераннарын, укучыларның әби-бабаларын котларга дип, мәктәпкә Марк Коган җитәкчелегендәге шәһәрнең тынлы оркестры да чакырылган иде. Алар башкаруында “Туган тел”, “Яктылык” гимннары, “Таң җыры” дип аталган халык көе аеруча тантаналы яңгырады. Ахырда кунаклар мәктәп ашханәсендә уздырылган корбан ашы алдыннан мөфти Талип хәзрәт Яруллинның вәгазен тыңладылар. Мөфти бала тәрбияләүдә укытучы, ата-ана, әби-бабай роленә басым ясап сөйләде. “Чөнки алар барысы да укытучылар, — диде ул. — Ана балага үз телебезне өйрәтә, әби белән бабай динне һәм гореф-гадәтләребезне сеңдерә, ә укытучылар гыйлем бирәләр. Шуңа да пәйгамбәребез олыларны һәм укытучыларны хөрмәт итәргә кушкан, үзе дә шундый үрнәк күрсәткән”.
Корбан мәҗлесе вакытында әбиләр мәктәптә укучы оныклары турында сөйләшеп утырдылар. 5 сыйныфта укучы Илнур Ибәтуллин, 2 сыйныф укучылары Диләрә Ибәтуллина һәм Илдар Сәлаховның әбисе Әминә Ибәтуллина, 2 сыйныфта укучы Әминә Хәйрованың дәү әбисе Сәрия Гыйльманова, 8 сыйныфта укучы Кәрим Вакказовның әбисе Зәлифия Әсәдуллина да татар мәктәбенә һәрвакыт бик теләп килүләре турында: “Биредә без туганнарча очрашабыз, һәрберебезнең балалары күз алдыбызда үсә, кемнең нәрсәгә сәләтле булуын белеп торабыз. Безнең мәктәптә тәртип бозучылар юк, чөнки биредә укыту гына түгел, тәрбия бирү эше дә югары дәрәҗәдә куелган. Укытучылар һәм укучылар безгә хөрмәт белән карыйлар, бөтен чараларга чакырып, сыйлап, концертлар күрсәтеп озаталар”, — дип сөйләделәр.
Похвистнево районының Гали авылында Өлкәннәр көненә багышланган зур мәҗлес уздырганнар һәм бәйрәм концерты куйганнар, дип хәбәр итә штаттан тыш хәбәрчебез Саимә Морзаханова.
Бу көнне авыл Мәдәният йортына килгән һәркемнең күңеле күтәренке, кәефе шәптән иде. Халык җыелган арада өлкән яшьтәге авылдашларыбыз бер-берсе белән аралашырга да, “Ак калфак” хатын-кызлар оешмасы җитәкчесе урынбасары Кәүсәр Шәйхетдинова Казаннан алып кайткан Йосыф хәзрәт Дәүләтшинның вәгазьләре яздырылган дискларны тыңларга да өлгерделәр.
Халыкны бәйрәм белән котлап, чараның рәсми өлешен авыл җирлеге башлыгы Идрис Муллабаев башлап җибәрде. Җитәкче мәҗлес үткәрүгә ярдәм итүчеләр Радик Сафиуллин, Камил Исхаков, Равил Харисовка, корбан ите бирүче Җәмилә Хәмидуллина гаиләсенә, Равил һәм Алсу Сафиуллиннарга һәм башка галилеләргә рәхмәтен белдерде.
Кичәдә авылны күтәрүгә зур өлеш кертүчеләрне дә зурладылар. 42 ел мәктәптә балаларга белеп биреп, быел лаеклы ялга киткән, Гали авылында төрле чаралар оештыруда актив катнашучы Кәүсәр Шәйхетдиновага, озак еллар китапханәдә эшләгән, бүген социаль ярдәм күрсәтү бүлеге белән җитәкчелек итүче Фәһимә Зариповага авыл җирлеге башлыгы Рәхмәт хатлары һәм бүләкләр тапшырды. Фәһимә ханым инде берничә ел рәттән авылда “Иң матур йорт хуҗасы” бәйгесен уздыра. Бу чарада ул быелгы җиңүчеләрне билгеләп, Мингани һәм Әминә Сафиуллиннарны, Мөдәррис һәм Гамбәр Гобәйдуллиннарны, Сания Хәмитованы, Әлфия Халимуллинаны (аңа 85 яшь) һәм Зөлфия Шәрәфетдинованы бүләкләде.
Галилеләрне Өлкәннәр көне белән котларга район вәкилләре дә килгән иде. Гөлсем Җәләлетдинова район башлыгы Юрий Рябовның тәбрикләү сүзләрен җиткереп, бик матур шигырь укып китте.
Тәбрикләүләр тәмамланганнан соң, Коръән хафиз Абдул Вахит Коръән сүрәләре укып, мәҗлесне башлап җибәрде. Гали авылы мәдрәсәсе ректоры Наил хәзрәт Курмаев корбан ашын үткәрүче гаиләләргә, 150 кешелек табын әзерләргә ярдәм итүчеләргә атап, догалар кылды. Сый тулы өстәлләр артында сыйланган арада галилеләр, килгән кунаклар авыл үзешчәннәре әзерләгән бәйрәм концертын да карадылар. Рузыя Йосыпова, Әбелхарис Насыйров, Алия Әхмәтова аларга иң матур җырларын бүләк иттеләр.
Ә түбәндәге хатны Шенталы районының Денис авылында яшәүче хәбәрчебез Нурсинә Хәкимова язып җибәргән.
Октябрьнең беренче көнендә авыл Мәдәният йортында Өлкәннәр көненә багышланган мәҗлес үткәрелде.
Авыл мәчете имамы Җәгъфәр хәзрәт Хәлимов Коръән сүрәләре укып, дога кылды, вәгазьләр сөйләде. Авыл җирлеге җитәкчесе Лимуза Бикмөхәммәтова да ветераннарыбызны бәйрәм белән котлап, рәхмәт сүзләре, авылның бүгенге яшәеше һәм киләчәге турында уй-фикерләре белән уртаклашты.
Аннан сәхнәдән Өлкәннәр көне хөрмәтенә концерт күрсәтелде. Тәкъзимә Хисмәтуллина гармунында үзе уйнаган көйләргә кушылып, элеккеге, сирәк яңгырый торган җырларны башкарды. Азат Ханнанов, Әнисә Нуретдинова, Ләйлә Хәбированың җырлавы да күңелгә ятышлы иде. Кем генә җырламасын, шигырь сөйләмәсен, тамашачы барсын да көчле алкышлар белән каршылады.
Өлкәннәр көненә багышланган бу күркәм бәйрәм мул итеп хәзерләнгән табын артында дәвам итте. Гомер көзенә керү бераз моңсу булса да, өлкәннәр югалып калмадылар, үзләре язган шигырьләрен укыдылар, үзара рәхәтләнеп аралаштылар.
Кабатланмас һәр дәвернең үз чоры, үз җае бар бит. Шатлыкка, бүгенге көндә авылыбызда намаз укып, дога кылып яшәүче, яшьләргә үрнәк булырлык өлкән яшьтәге абый-апаларыбыз байтак. Алар белән шундый очрашулар киләчәктә дә дәвам итсен иде.
Камышлы районында да Өлкәннәр көненә карата мәдәни чаралар уздырылуы турында Балыклы авылының Мәдәният йорты хезмәткәре Линар Абсаттаров хәбәр итә.
Мәдәният йортында бәйрәм чарасы уздырылганда кояш җиргә соңгы җылы нурларын сибеп, бәйрәмгә баручыларга юл күрсәтеп барды сыман. Фойеда авылдашларны сый-хөрмәт белән тулы өстәлләр көтеп тора, бәйрәмчә музыка яңгырый иде. Балыклы мәктәбе укучылары – шул залда утыручы әби-бабайларның сөекле оныклары, аларга багышлап шигырьләр сөйләделәр, моңлы җырлар бүләк иттеләр.
Балыклы авылы имамы Ринат хәзрәт Хәлимов, Балыклы җирлеге башлыгы Рәсил Йосыпов, “Шәфкатьлелек” социаль ярдәм күрсәтү бүлеге җитәкчесе Резедә Шәрәфетдинова, Балыклы мәктәбе директоры Тәүхилә Абсаттарова, ветераннар оешмасы рәисе Раил Вахитов, районыбызның Мактаулы граҗданины Хәбибулла Нигъмәтуллин олыларга тәбрикләү сүзләре белән мөрәҗәгать иттеләр. Ә олылар исеменнән Венера ханым Йосыпова чыгыш ясап, лаеклы ялда булган кешеләрнең берсен дә онытмыйча, шундый матур бәйрәм оештырулары өчен рәхмәтләрен җиткерде.
Язманы Әминә ШИҺАПОВА әзерләде.
Просмотров: 1094