Татлы сүз – иң зур дәва

Кичә, 17 июньдә, Медицина хезмәткәрләре көнен билгеләп үттек

Медицина практика­сында шәфкать туташ­ла­ры­­ның хез­мәте зурдан. Хас­таха­нә­ләр­дә дә, сыр­хау­ханәләрдә дә, ашыгыч ярдәм хез­мәтендә дә алар та­биб­ларның беренче ярдәм­челәре. Алай гына да түгел әле, шактый медицина процедураларын нәкъ шушы һөнәр ияләре башкара.

Самараның 15 санлы сыр­хауханәсендә шәфкать туташы булып эшләүче Эльвира Иманголованың да эш ва­кыты табибныкына кара­ганда иртәрәк башлана, соң­рак тәмамлана: кабул ите­ләчәк пациентларның медицина карталарын әзерлисе, лабораториядән анализларны барып аласы, язулар тутырасы бар. Ә эш сменасы тәмамланганнан соң, Эльвира туташ сырхауханәгә килә алмаган авы­руларның өйләренә барып, табиб кушкан процедураларны башкара.

Сабыр, игътибарлы, аралашучан бу туташны хезмәт­тәшләре дә, авырулар да хөрмәт итә. Соңгылары яраткан шәфкать туташларын мактап, баш табиб Ирина Назаркина исеменә Рәхмәт хатларын яудырып кына торалар. “Эльвира Равил кызы үз эшендә чын профессионал, югары квалификацияле медицина хезмәткәрләре генә башкара алган процедураларны да бернинди кыенсызлык белән башкара. Дә­валану курсы тәмамлангач та, хәлебезне белешеп, файдалы киңәшләрен биреп тора. Ул дарулар белән генә түгел, ягымлы карашы, тәмле сүз­ләре белән дә дәвалый. Олы яшьтәге кешеләргә бу иң зур дәва”, — дип язылган аларның берсендә. Һәм мондый хатлар дистәләгән.

- Кечкенәдән кешеләргә яр­­дәм итәргә, файдалы булыр­га тели идем. Бүген сә­ла­мәтләнгән пациентларымнан рәхмәт сүзләрен ишетеп, бу һөнәрне юкка гына сайламаганмын икән, дип куанам. Сеңелем Гүзәл дә минем эздән китте.

Кызганыч, Самарада медицина бел­геч­ләрен әзерләүче уку йортлары шактый булса да, бүген яшь белгечләр дәүләт хас­таханәләренә, поли­­клиникаларга эш­кә килер­гә ашыкмый. Аларны аң­лап та була. Хезмәтебез җа­вап­лы һәм авырлар­дан, ә эш ха­кы бик түбән, — дип сөйли милләттәшебез.

Тырыш, өлгер Эльвира Равил кызы үзе дә өч урында эш­­­ли: сырхауханәдән тыш әле, “Россия” телевизион компаниясенең Самара бүлеге, шә­һә­ребезнең Гагарин исемендәге паркы машина йөртүчеләренә дә рейска чыгар алдыннан медицина каравын уздыра.

Ә ял көннәрендә ул әти-әнисе янына – Ульян өлкәсенең Яңа Спас районына кайтырга, дип ашкынып тора. Эльвира күп балалы гаиләдә туып-үскән. Кы­зыл бистәсендә кү­бе­­сенчә руслар яшәсә дә, Рузалия апа белән Равил абый балаларына милли тәрбия биргәннәр.

- Өйдә без бары тик татар телендә генә сөйләшәбез. Милли, зур дини бәй­рәм­нәрне һәрвакыт билгеләп үтә­без, гаилә тантаналарын да го­реф-гадәтләргә ту­ры китереп бәй­рәм итәбез, — дип сөйли Эльвира туташ.

Ә менә үз гаиләсен корырга ул әлегә өлгермәгән. “Йөрәгем ирекле, өлешемә тигән көме­шемне очратмадым әле”, - дип шаярта милләттәшебез.

Озын кара чәчле, янып торган йөзле, сылу буй-сынлы, ә иң мөһиме, олы йөрәкле Эльвира, һичшиксез, шәхси тормышында да бәхетле булыр. Аның күңеле дә, һөнәре кебек, изге. Эльвира кебек күңел җылылыгын кызганмый, көне-төне хезмәт итеп, ке­ше­ләрнең сәламәтлеге сагында торучы ак халатлы һөнәр ияләрен юкка гына шәфкать туташлары, дип атамаганнардыр шул.

Алия АРСЛАНОВА.

«Бердәмлек».

Просмотров: 1081