“Бердәмлег”ем белән горурланам

imageТуган авылым Таллыда яшәгәндә дә, балаларым яши торган Пестравка район үзәгендә хөкүмәт миңа фатир бүлеп биргәч тә яраткан “Бердәмлек” газетамнан аерылмадым, даими язылып, укып барам. Менә җәй үткәрергә Таллыдагы йортыма кайткач та, “Бердәмлек” килүдән туктамады, атна саен хат ташучы китереп тора. Газета килгәч, күңелем үсеп китә, дәрт-дәрманым арта. Тик елның икенче яртысында аның тиражы кимүе генә бераз эчемне пошырды, әлбәттә.

Кыш, яз буе мин “Бердәмлек” белән беррәттән “Волжская коммуна” газетасының атналык “Җомга” чыгарылышын да, Пестравка районының “Степь” басмасын да укып бардым. Бу газеталарга үзем язылмадым, балаларым яздырганнар. Ә аларны, бюджет хезмәткәрләрен — табибларны, укытучыларны, район хакимияте боерыгы буенча, моңа мәҗбүр ит­кәннәр икән. “Язылмасагыз, хезмәт хакыгыздан тотып калып, үзебез яздырачакбыз”, — дип куркытканнар. Шуңа да, күрәсең, бу басмаларның соңгы битләрендә күрсәтелгәнчә, тиражлары шактый зур — “Волж­ская коммуна”ныкы — 75 мең, ә “Степь”неке 3 мең данәдән дә ким түгел. “Бердәмлег”ебезне дә шундый юл белән яздырып, тиражын арттырып булмас микән? Мин бит башка газеталарга караганда үзебезнекеләрне – “Бердәмлек” белән “Ыргыз”ны күбрәк яратам. Башка мил­ләттәшләребез дә аларны өй­ләренә яздырып, даими укып барсалар, начар булмас иде.

“Волжская коммуна” газетасында мин тагын бер уңай нәрсәгә игътибар иттем. Аның һәр санында редакциядә эш­ләгән 18 кешенең дә исем-фамилияләре күрсәтелеп бара. Әгәр “Бердәмлек”тә дә шулай итсәгез, файдадан башка нәрсә булмас иде, дип уйлыйм. Укучылар яраткан хәбәрчеләренең, башка хезмәткәрләрнең исем-фами­лияләрен белеп, рә­сем­нәрен дә күреп торсалар, “Бер­дәмлег”ебезнең абруе артыр иде, минемчә.

Үпкәләмәгез, бу минем шәх­си фикерем генә, әлбәттә. Шулай да, өлкән бабагызның, иң актив укучыгызның фикеренә колак салсагыз, мин бик тә шат булыр идем. Моны, бәлки, башкалар да хупларлар.

Габделәхәт ЛАТЫЙПОВ,

85 яшьлек хезмәт ветераны.

Таллы авылы,

Большая Черниговка районы.

«Бердәмлек».

Просмотров: 805

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>