Уразага керү көне булып 18 июнь билгеләнгән
Еш кына шундый фикерне ишетергә туры килә. Имеш, Рамазанның башында – өч, уртасында – өч, ахырында өч көн тотсаң, тулы ай савапларына ирешәсең. Кайберәүләр хәтта өч көн тотсаң да ярый, дип куя. Мин бу хакта Самар Җәмигъ мәчете хәзрәтләреннән сораштым әле.
Бу фикер нәфел уразаларына карата әйтелергә тиешле икән. Пәйгамбәребез Мөхәммәд (с.г.в.) үзенең хәдисләрендә, Рамазаннан кала, башка айларда айның 13, 14, 15нче көннәрендә ураза тотарга куша. Аллаһы Тәгалә бер изге гамәлгә, ким дигәндә, ун савап язганлыктан, өч көн ураза утыз көннең савабына ирешергә мөмкинлек бирә. Шулай итеп, мөселманнар ел әйләнәсенә ураза тоткан савапка ирешә.
Әмма Рамазан аендагы утыз көн ураза балигъ булган яшьтән алып мөселманнар өчен фарыз кылынган. Шуңа күрә бу утыз көнне сәфәрдә булганнар, авыру сәбәпле, яисә хатын-кызлар күрем күрү аркасында калдырсалар, соңыннан бер көнгә бер көн тотып бурычны түлиләр. Ә инде картайган, хәлсезләнгән, яисә ураза сәбәпле авыруы көчәю куркынычы булган кешеләр бер көн ураза өчен бер көн буена бер мескен кешене ашатып туйдырырлык күләмдә садака бирәләр. Әлбәттә, тагын мөһим: хәленнән килсә, үзе мохтаҗлык кичермәсә.
Фәридә САФИНА.
Самара шәһәре.
Просмотров: 1226