Быел татар телен, динебез ислам нигезләрен өйрәнү буенча татар-башкорт балалары өчен җәйге лагерь гадәттәгечә Кинель-Черкасс районындагы “Колос” лагерендә түгел, ә Самарның 2нче просекасында урнашкан “Алтын балык” лагерендә оештырылды. Хәзер анда иллеләп бала саф һавада сәламәтлекләрен ныгыталар, остазлары ярдәмендә ислам динен, татар телен, гореф-гадәтләрбезне өйрәнәләр. Дин дәресләре төрле уеннар, конкурслар һәм викториналар ярдәмендә кызыклы итеп үткәрелә. Ә 19 июльдә “Алтын балык” лагерендә балалар өчен Сабан туе да оештырылды.
Бәйрәмне ел саен өлкә «Туган тел» татар җәмгыяте вәкилләре Фәрхәт һәм Альбина Мәхмүтовлар алып баралар. Быел аларга «Туган тел» оешмасы канаты астындагы яшьләр төркеме — Татарстан Республикасында оештырылган “Милләтебез хәзинәләре” профильле сменада ял итеп кайткан яшь милләттәшләребез дә ярдәмгә килде. Иң элек алар шигырьләр укыдылар, театральләштерелгән поэтик куелышлар, музыкаль-иҗат номерлары тәкъдим иттеләр. Мәсәлән, «Яктылык» мәктәбе укучысы Әдилә Рәхимова «Ярмәк вагы»н биеде, Фәрзәнә Мәхмүтова «Хәерле көн», «Туган җиремә» җырларын башкарды, «Яктылык» мәктәбенең чыгарылыш укучылары Илнур Биккулов та җырлады, Илмира Мәҗитова Кави Нәҗминең «Татар теле» шыгырен укыды. Ахырдан барысы да бергәләп «Татарлар килә» җырын башкардылар.
Сабантуйда таяк тарту, чүлмәк вату, капчык киеп яисә кашыкка йомырка куеп, авызга кабып йөгерү һәм башка кызыклы уеннар үткәрелде.
Бу бәйрәмне тәрбиячеләр дә, балалар да, хәтта ата-аналар да көтеп алалар. Бәйрәмдә ел саен региональ Диния нәзарәте рәисе, мөфти Талип хәзрәт Яруллин да катнаша, ә чыгымнарны өлкә “Дуслык” иҗади-иҗтимагый оешмасы президенты, эшкуар Фәхретдин Канюкаев үз өстенә ала.
Просмотров: 1589