Гөлзадә Сафиуллинаны самаралылар үзләренеке дип саный алалар, чөнки ул яшьлек елларында ире — шул чактагы күренекле татар җырчыларыбызның берсе — Риф әфәнде (күптән мәрхүм инде, урыны оҗмахта булсын) белән бергә дистә елга якын Куйбышев өлкә филармониясендә татар төркеме оештырып, шәһәр һәм авылларда концертлар күрсәтеп йөргән кешеләр. Менә хәзер аларның оныклары Ширин үсеп җиткән һәм дәү әнисе һәм дәү әтисе кебек җырчы һөнәрен сайлаган.
Без аның белән интервью турында килешкәч тә, кызның беренче сүзе «әйдә «Лакомка»га барабыз» булды. Исеме баллы, татлы дигәнне аңлаткан Ширин Аль-Анси үзе дә тәм-томга битараф түгел икән.
Сезгә дә, хөрмәтле укучыларыбыз, бу талантлы яшь җырчының уй-фикерләре кызыклы булыр дип уйлыйбыз.- Ширин, син татар альтернатив музыкасында иҗат итүчеләрнең берсе. Ни өчен бу юнәлешне сайладың?
- Татар җырын яңарту теләгем бу. Мин җырларны үзем ничек сизәм — шулай башкарам. Ул джаз юнәлешендә дә, рок буларак та формалашырга мөмкин. Моннан биш ел элек бөтен «попса» булмаган җырларны альтернатив татар музыкасы дип йөртә башладылар. Ләкин алай әйтү дөрес түгел. Минемчә, аларны жанрларга аерырга кирәк. Татар җырында рокка, джазга омтылышлар һәрвакыт бар иде. Ләкин ул киң масштабларга чыга алмады. Нинди юнәлештә башкарылса да, татар җырының үзенчәлеге югалмасын иде.
- Син җыр дөньясында экспериментлар яратасың дип беләм, ә тормышта аңа ничек карыйсың?
- Минем иҗаттагы экспериментларым үзеннән-үзе килеп чыга, махсус ясамыйм. Хәзер менә татар җырларын дөрес башкарырга өйрәнәм. Әйе, тормышта да шундый мин. Көтелмәгән, экстремаль хәлләрне яратам. Әйтик, быел парашют белән сикердем. Тәлинкәдә китереп биргәннәрен ошатмыйм, гел нәрсәгәдер омтылырга, ирешергә кирәк миңа.
- Кайчандыр: «Музыка — ул ирләр эше түгел», дигәнсең, хәзер, белүемчә, энең Мурат та иҗатка тартыла, әле дә үз фикереңә тугры булып каласыңмы?
- Бу сүзләрем яшүсмер максимализмы булгандыр, чөнки хәзер мин башкача уйлыйм. Һәр кеше үз һөнәрен үзе сайлый. Ир кеше, хатын-кызга караганда, төплерәк булырга тиеш. Ә сәнгать тотрыклы өлкә түгел. Бәлки шуңа иҗат ир-ат эше түгел дигәнмендер. Энем рэп яза, араларында сәяси темага багышланганнары да бар. Кайвакыт ул: «Ширин апа, әйдә мин бу җирен җырлыйм, ә син бу урында менә болай җырларсың», — дип ялыктырып бетерә. Ул сәнгать юлыннан китәргә теләсә дә, барыбер төпле белем алачак.
- Казан Федераль университетының социология бүлеген дә тәмамладың, ГИТИС дипломы да кулыңда. Төп юлыңны да сайладыңмы инде?
- Әлегә юк. Сәнгать белән акча эшлисем килми. Төп кәсеп иҗат юнәлешендә булса, ул инде бизнеска әверелә. Ә бизнес булган сәнгать чын сәнгать түгел инде ул. Мин шоу-бизнес өлкәсеннән читтә торырга тырышам. Яшәр өчен башка җирдән акча эшләп, күңел өчен, үзем өчен иҗат белән шөгыльләнер идем.
- Сәнгать дөньясын эчтән беләсеңме инде?
- Сәнгать ул — зур бизнес. Һәрвакыт күз алдында торган, радио, телевидениедә яктыртылган «йолдыз»лар иң сәләтле кешеләр икән, дигән ялгыш фикер туа. Ләкин бу бик яхшы пиар хезмәте генә. Бик сәләтле, искиткеч кешеләр бар, ләкин аларны күрмиләр. Мин, гомумән, пиарга каршы, минемчә, ул чын сәнгатьнең дәрәҗәсен төшерә.
- Дәү әниең, Татарстанның халык артисты Гөлзадә Сафиуллинаны белмәгән кеше юк. Син аның нинди сыйфатларын үзеңдә булдырыр идең?
- Ул — көчле холыклы шәхес. Мин, киресенчә, барысын да күңелемә якын алам. Дәү әнинең менә шул ягын үземә алырга теләр идем. Кеше әйткән сүзгә игътибар итмәскә өйрәнергә кирәк. Ә бәлки дәү әни читтән караганда гына көчледер, бәлки ул да кеше әйткән сүзләргә игътибар итә, күңеленә якын аладыр, ләкин ул аларны күрсәтми.
- Гаиләгездә берничек тә бозарга ярамый торган кагыйдәләр бармы?
- Бездә ислам дине, татар милләте кануннары бик көчле. Биш тапкыр булмаса да, көненә бер намаз укырга тырышам. Өйдә гел татарча сөйләшәбез. Вакытыбыз тыгыз булса да, бергә сөйләшеп утырырга, дебатлар корырга яратабыз.
- «Татар кызы — 2011», «Краса студенчества России» бәйгеләрендә җиңгән кеше син. Ширин, әйт әле, синеңчә, хатын-кыз матурлыгы нидән гыйбарәт?
- Хатын-кызның матурлыгы эчке дөньясында чагыла. Тыштан матур булсаң да, эчтәге яну-көюләрне барыбер яшереп булмый. Минемчә, кешенең эчке дөньясы нинди булуы олыгайгач күренә. Кайчакта җыерчыклы биткә дә сокланып карыйсың, аннан нур бөркелә. Матурлык конкурсында да тышкы матурлыкка гына карыйлар дип уйламыйм. Кешедәге харизма, сәләт башкаларны җәлеп итә. Минем бу конкурсларда катнашуым «Ширин, син бер урында таптанасың, алга бармыйсың, әйдә яңа әйбер уйлап табабыз!» дигәннән башлана, максатка ирешү өчен бу — бер баскыч кына.
- Бер юлы: «Мин көн саен төрле кеше булам», — дигән идең, бу үзгәрүең нидән бәйле?
- Минем холкым шундый. Мин уйларымны, проблемаларны төрле яктан карарга яратам. Шуңа күрә социология дә кызыксындыргандыр үземне. Төрлечә фикер йөрткәндә, син үзең дә төрле кешегә әйләнәсең ул.
- Тормышта иң зур хыялың нинди?
- Минем хыялларым күп. Быел менә берсе тормышка ашты — парашют белән сикердем. Тагын бер кечкенә чактагы хыялым бар — океанда коенасым килә. Инде быел анысы да Һиндстанга баргач тормышка ашыр дип уйлаган идем — булмады, Һиндстанның бөтенләй икенче ягына барып чыктык, ләкин мин моңа сөендем генә. Бөтен хыялларым тормышка ашса, максатсыз калырмын дип куркам. Һәр кешегә хас булганча, мин дә яраткан эшем, мәхәббәтле гаиләм булуын телим. Иҗатта да үз юлымны табасым килә.
Алисә САБИРОВА.
(“Шәһри Казан” газетасы).
Просмотров: 1332