23 декабрьдә Камышлы авылының социаль реабилитацияләү бүлегендә Мәүлид ае уңаеннан корбан мәҗлесе үтте. Чарага бүлектә ял итүче өлкәннәр — күп еллар «Мир» колхозында сыер савучы булып эшләгән, ә бүгенге көндә лаеклы ялда булучы апалар чакырылган иделәр.
Мул табыннар тирәли Наҗия апабыз Коръән сүрәләрен укыды, Галимә апабыз Әхмәтшина хәзрәти Рәсүлебезгә тәкбир әйтте, садакалар таратылды.
Оешмабызның җитәкчесе Наилә Таһир кызы Габидуллина өлкәннәрне олы дини бәйрәм белән тәбрикләп, үзләренә исәнлек, озын гомер, мул тормыш, җан тынычлыгы теләде. Үз чиратларында килгән кунаклар да бәйрәм табынын әзерләүчеләргә тән сихәтлеге, тигезлек, бәрәкәтле тормыш теләделәр.
Корбан табынына бик зур өлеш керткән Галимә апа Әхмәтшинага зур рәхмәтебезне белдерәбез. Аның урамалары, җәймәләре, балан-миләш кыстырганнары, тозлы карбызлары, корбан ите бик тәмле булды. Гомумән, барча кунакларга да олы рәхмәтләребез барып ирешсә иде, алар алып килгән күчтәнәчләр һәм садакалар әҗердән булсын.
Киләсе елларда да исән-имин күрешергә, бәйрәм табыннарында җыелырга насыйп булсын, дип телделәр ахырдан кунаклар.
Рушания Сәгыйть кызы ДИНДАРОВА,
Камышлының социаль реабилитацияләү бүлеге җитәкчесе.
Просмотров: 1221