“Исем китә гармунчыга:
Ничек талмый куллары?
Сөйгән яры көч бирәдер,
Булсын тизрәк туйлары”, - дип җырлана татар халык җырында. Бүген Тольяттида гомер итүче оста гармунчы Наил Ваһитовка карап, бу сүзләрнең дөрес булуына тагын бер кат инанасың. Тормыш иптәше Тәнзилә белән гаилә коруларына инде 54 ел тулса да, Наил абый һаман аңардан илһам алып яши, иң матур җырларын аңа багышлый.
Наил Вәли улы тумышы белән Камышлы районының Балыклы авылыннан. Ә 1963 — 1964 елларда ул Яңа Мансур авылына агроном булып эшкә килде.
Үз эшен яхшы белгән намуслы яшь белгечне авыл халкы бик тиз үз итте. Егет тә әле күптән түгел генә мәктәптә эшли башлаган чибәр Тәнзиләгә гашыйк була. Наил дә кызның күңеленә бер күрүдә кереп утырган икән. Яшьләр арасында мәхәббәт ялкыны кабына, һәм тиздән алар гаилә корып җибәрәләр. Ә бераздан тормышларына тагын да ямь өстәп, беренче балалары Руслан дөньяга аваз сала.
1967 елда Ваһитовлар Әлмәт шәһәренә күченеп китәләр. Анда Наил әфәнде махсус белем алып, “Газпром” оешмасына эшкә керә. Яңа урында да ул тырышлыгы, бөтен эшен җиренә җиткереп эшләве белән хезмәттәшләренең, җитәкчеләрнең хөрмәтен яулый алган.
Язмыш юллары урау, диләр. Ваһитовлар гаиләсенә дә бер урында гына төпләнеп яшәргә язмаган икән. 1980 елда алар Тольяттига барып урнашалар. Тәнзилә апа мәктәптә, ә Наил абый җирле “Газпром” оешмасында хезмәт куялар. Гаиләдә бер-бер артлы тагын ике бала — Рафаэль белән Наилә туалар (бүген алар гаиләләре белән Самарада яшиләр).
Менә шулай матур гына гомер иткәндә Ваһитовлар гаиләсенә зур кайгы килә. Наил абый белән Тәнзилә апаның олы уллары Руслан, көтмәгәндә, 33 яшендә вафат була. “Йөрәк ярасын вакыт төзәтми, еллар узган саен яра ныграк сызлый икән”, — дип бу авыр югалту белән бүген дә килешә алмыйлар алар. Кешегә күрсәтмичә генә утта яналар.
Күп еллар җаваплы урыннарда хезмәт иткән Наил Вәли улы җәмгыять эшләрендә дә катнашырга өлгерә. Көйгә-моңга бай кеше буларак, Тольяттида “Язлар моңы” фестивалендә дә, шәһәр Сабан туйларында да катнаша ул. Дусты Рәмзил Фәритов белән, берсе җырлап, икенчесе баянда уйнап, чыгыш ясаганнары тамашачыга бигрәк тә ошый.
Наил абый күңелгә үтеп керерлек шигырьләр дә яза. Аның иҗат җимешләре Самара өлкәсенең “Сохраним и преумножим” дигән китапта басылып чыкты.
Шушы көннәрдә Наил абый 80 яшьлек юбилеен бәйрәм итсә дә, ул күпкә яшь күренә. Киләчәктә дә шулай актив булып, милләтебезне берләштерүгә үзенең лаеклы өлешен кертер, дигән өметтә калабыз. Моңлы гармун тавышы, шигырьләре белән милләттәшләребезне сөендереп яшәсен иде.
Наил абый, сезгә алдагы көннәрдә дә Тәнзилә апай белән пар канатлы булып, тазалыкта, татулыкта, бер-берегезнең кадерен белеп, балаларыгызның уңышларына куанып, оныкларыгызга сөенеп яшәргә насыйп булсын.
Румия ШӘРИЕВА, ветеран укытучы.
Яңа Мансур авылы,
Похвистнево районы.
Просмотров: 1066