Татарстанда сигезенче тапкыр Бөтенроссия татар авыллары эшмәкәрләре җыены узды. Бөтендөнья татар конгрессы оештырган бу чарада Россиянең 39 төбәгеннән 800ләп кече бизнес вәкилләре һәм фермер хуҗалыклары җитәкчеләре катнашты. Һәрвакыттагыча, анда Самара өлкәсеннән дә зур делегация барган иде. Якташларыбызның бу сәфәрдән алган тәэсирләре белән уртаклашуыларын соралдык.

Идрис Муллабаев, Пох­вистнево районының Гали авылы җирлеге башлыгы:

- Җыенның программасы кызыклы итеп оештырылган иде. Беренче көнне дүрт төркемгә бүленеп, “Авыл ке­шесенең төп байлыгы булган җир белән эшләү ысуллары”, “Хуҗалык итү төрләре”, “Авылда җитештерелгән продукцияне эшкәртү һәм сату, кооперация” һәм “Татар авылының киләчәге һәм аның үсешенә яшьләрне җәлеп итү юллары” темаларына фикер алышулар узды.

Ә икенче көнне безне Та­тарстанның Мөслим районына алып барып, андагы эш­мәкәрлек үсеше белән таныштырдылар. Делегатлар “Агромастер” заводында, “Чайка” фермер хуҗалыгында булдылар, шулай ук, Мөслимнең Аграр колледжы һәм гимназиясе белән таныштылар.

Район соңгы биш елда уңай якка зур үзгәрешләр кичергән икән. Анда юллар салынган, зиратлар чистартылган, спорт объектлары төзелгән, парклар булдырылган. Бөтендөнья татар конгрессының Башкарма комитеты җитәкчесе Ринат Закиров бу үзгәрешләр биш ел элек район башлыгы булып эшли башлаган Рамил Муллин тырышлыгы белән тормышка ашырылуын белдерде. Ә район җитәкчесе, үз чиратында, халык белән бергәләшеп эшләгәндә генә шундый югары  уңышларга ирешеп була, диде.

Безнең Гали авылында да шәхси эшмәкәрләр шактый. Алар күп авылдашларын эш урыннары белән тәэ­мин итәләр, авылны матурайту, төзекләндерүгә үз өлеш­ләрен кертәләр. Юмарт авылдашларыбызның ярдәме белән Гали авылында төрле бәйрәмнәр, чаралар, татар концертлары уздырылып тора. Бу турыда Бөтенроссия татар авыллары эшмәкәрләре җыенында да сөйләдем. Күбе­сенең Гали авылы турында ишетеп белүе күңелгә горурлык хисе өстәде.

Фәйзрахман Фәтхуллов, Кызыл Яр районының Уг­ловой бистәсендә яшәүче шәх­си эшмәкәр:

- Мин йөк ташу белән шө­гыльләнәм. Шәхси йортта яшә­гәнлектән, терлек үрчетергә дә теләк бар. Тик фермер хуҗалыклары оеш­­тырып җи­бәргән таныш-белешләрем арасында: “Авыр”, — дип ташлаучылар да аз түгел.

Татарстанда крестьян-фермер хуҗалыклары хөкүмәт ярдәмен тоеп яшиләр. Анда эшмәкәрлеккә, аеруча авыл хуҗалыгы тармагында эшләүче бизнеска ярдәм итү өчен респуб­лика программалары булдырылган. Мөслимгә баргач та, Казанда узган пленар утырышта да бу турыда эшмәкәрләр күп сөйләде, хөкүмәт вәкилләренә, Татарстан Президенты Рөс­тәм Миңнехановка кат-кат рәх­мәтләрен җиткерделәр.

Ә Самара өлкәсендә фермер­лар үзләре җитештергән про­дукцияне кая куярга бел­миләр, итне, сөтне үз­кыйм­мә­тен­нән арзанрак сатарга мәҗ­бүр булалар. Шуңа да бүген авыл­ларда мал асраучылар юк диярлек.

Безнең регионда гына түгел, башка төбәкләрдә дә шул ук хәл икән. Мәсәлән, Чувашия Республикасының Батыр районы “Сәнҗапов” крестьян-фер­мер хуҗалыгы җитәкчесе Рә­шит Сәнҗапов хәтта Татарстан эшмәкәрләренә көнләшеп каравын әйтте. 

Пленар утырышта чыгышлар күп булды. Аларның һәркайсы кызыклы, һәркемне борчыган мәсьәләләрне яктырта иде. Рөстәм Миңнеханов аларның кайберләрен шунда ук хәл итәргә тырышып,  төрле органнар вәкилләренә боерыкларын биреп торды.

“Авыл — ул нигез. Һәр мил­ләтнең нигезе. Гореф-гадәт­ләребезне, татарлыгыбызны шәһәрдә саклавы бик авыр. Шуңа авылга ярдәм итү өчен, эш урыннары булды­рырга кирәк”, — дигән иде үзенең бер чыгышында Рөстәм Миң­не­ханов. Бу чынлап та шулай. Моны безнең җитәкчеләр дә аңласын, җир кешесенә, авыл эшмәкәрләренә ярдәм итү чараларын тапсыннар иде.

Әминә ШИҺАПОВА әзерләде.

«Бердәмлек».

КОНТЕКСТ:

Рустам Минниханов: «В России 20 миллионов мусульман, и им нужна халяльная пища!», «В городе сохранить татарскость тяжело, поэтому нужно помогать селу»

Просмотров: 1025