Авылым турында шигырь язарга теләгем зур иде. Гали авылында яшәүче Саимә Морзахановага мөрәҗәгать иттем. Минем соравым буенча ул шушы шигырьне язып бирде.
Бадия Кәримова.
Яңа Мансур авылы,
Похвистнево районы.
Яңа Мансур авылын
Уратып алган урман.
Халкы уңган. Җырга-моңга
Туганда ук бай булган.
Мансур авылын бүлеп лә,
Ага елга сулары.
Адаштыра-кавыштыра
Бормаланган юллары.
Туган төбәк — асыл ягым,
Төшәм су буйларына.
Колмаклар үрелеп менгән
Бөдрә яшь талларына.
Диңгезмени, җәйрәп ята
Иген кыр-басулары.
Һәр чишмәнең үз моңы бар,
Тарата сагышларны.
Аларның көмеш сулары
Челтерәп агып ята.
Йөрәк ярсуларын баса,
Эчсәң сусаган чакта.
Тәнгә-җанга шифа бирә
Җиләкле аланнары.
Сөю гөлләре үстерә
Печәнле болыннары.
Ераклардан күренеп тора
Яңа Мансур авылы.
Оҗмах бакчасына тиңлим
Туып-үскән авылымны.
Яңа Мансур — туган авылым,
Ник йөрәккә якын син?
Бәрәңге бакчаларың да
Роза гөлләренә тиң.
Авылым оеп утыра
Табигать кочагында.
Сихри булып күренәдер
Ай-йолдызлар астында.
Саимә МОРЗАХАНОВА.
Просмотров: 1214