Муса Җәлилнең туган көнендә өлкәбезнең бөтен татар мәктәпләрендә һәм китапханәләрендә төрле чаралар уздырылачак, шигырьләре яңгыраячак, тиңсез батырлык белән сугарылган тормыш юлы яктыртылачак.
Самараның “Яктылык” татар мәктәбе укучылары, мәсәлән, Монголия тәкъдим иткән онлайн Халыкара сәнгатьле шигырь уку конкурсында катнаштылар. Исмәгыйлева Румия Әгъзам кызы укыткан 3 «Б» сыйныфы укучылары конкурска үзләренең чыгышларын төшереп җибәргәннәр, хәзер инде нәтиҗәләрен көтәләр.
Камышлы район китапханәсе район масштабында шигырь укучылар конкурсы уздырачак, дип хәбәр итә китапханәче Зөлфия Яруллина. Иске Ярмәк авылы урта мәктәбенең татар теле укытучысы Фәния Гатина хәбәр итүенчә, коронавирустан саклану чаралары тулысынча үтәлеп, авыл китапханәсендә укучы балалар өчен Муса Җәлил шигырьләрен уку буенча Шигърият сәхифәсе үткәреләчәк.
Иске Усман китапханәчесе Гөлнур Вәлиуллина да авыл халкы арасында шигырь уку конкурсы оештырырга җыена. Авыл активистлары Тәслимә Борһанова, Мәгърифә Гыйльфановалар балалар бакчасында тәрбияләнүче өлкән төркем балаларын җыеп, Муса Җәлилнең тормыш юлы, балалар өчен язылган шигырьләре белән таныштырачаклар. Китапханәче Муса Җәлилнең китапларыннан күргәзмә дә оештырачак.
Әлбәттә, Татарстанда Муса Җәлилгә багышланган чаралар киңрәк форматта үткәрелеп, 13 – 16 февральдә күпсанлы концертлар, конкурслар һәм мастер-класслар узачак.
ТР Мәдәният министрлыгының матбугат хезмәте хәбәр итүенчә, фестиваль концертлары Казан, Чаллы, Түбән Каманың сайлап алу турын узган һәм 2019 — 2021 елларда фонд стипендиаты булып танылган талантлы яшь музыкантлар катнашында узачак. Чарага шулай ук Мәскәү стипендиатлары да чакырулы.
Концертлар 14 февральдә Казан консерваториясенең кече залында, 15 февральдә Сәйдәшев исемендәге Зур концерт залында һәм 16 февральдә «Сәйдәш» мәдәният үзәгендә узачак. Биредә III Халыкара «Җәлил укулары» конкурсы лауреатлары башкаруында Муса Җәлилнең татар, рус һәм инглиз телләрендә шигырьләре яңгыраячак.
16 февральдә «Адымнар» полилингваль комплексында «Төп нөсхә көне» уза. Мәктәп укучыларына Җәлилнең төрмәдә язган уникаль Моабит дәфтәрләрен күрсәтәчәкләр, кызы Чулпан Җәлилова белән очрашачаклар, Мәскәү һәм Казан яшь музыкантлары башкаруында Муса Җәлил яраткан көйләр яңгыраячак.
Просмотров: 1014