Изге Рамазан аенда авыл җирлекләребездә ифтар мәҗлесләре уздыру күркәм гадәткә әверелеп бара. Шушы көннәрдә безнең Денис мәчетендә - 41нче номерлы мәхәлләдә дә ифтар ашы үткәрелде.
Бары тик хәләл ризыклардан әзерләнгән сый-нигъмәтле табын артында якынча җиде дистәдән артык кеше кунак булды. Өлкән яшьтәгеләр белән беррәттән, араларында яшьрәк авылдашларыбыз булуы аеруча сөендерде. Җыелучылар имам-хатыйп Рәис Әхмәтовның вәгазен тыңладылар, ул Аллаһы Тәгалә китабындагы:
«Яхшылык эшләргә, тәүбә кылырга ашыгыгыз, җәннәткә ашыгучылардан булырсыз. Ачуыгызны эчкә алыгыз, дошманнарыгызны гафу итегез. Әлбәттә, Аллаһы Тәгалә игелек кылганнарны сөядер», — дигән сүзләргә киңәйтеп аңлатма бирде.
Имам җитәкчелегендә намазлар укылды. Ахшам намазыннан соң каен суы белән авыз ачу — аеруча истә калырлык күңелле мизгелләр. Рамазан аеның — мөбәрәк изге айның тәравих намазлары, Аллаһы ризалыгы өчен оештырылган шушы изге эшләр кабул һәм дәвамлы булсын!
Рамазан аенда һәркайсыбызга, күңел түрләребезне сафландырып, изге гамәл-гыйбадәтләр кылып, Аллаһы Тәгаләнең чиксез рәхмәтенә, дөнья-ахирәт бәхет-сәгадәтенә ирешергә насыйп булса иде! Амин!
Килгән кунаклар исеменнән, мәҗлесне алып баручы дин әһелләренә, чыгымнарны күтәрүче авылдашларга, өстәлләр коруда-җыюда актив катнашучыларга һәм ифтарга килүче Денис авыл халкына олы рәхмәтләребезне юллап калабыз.
Рагидә БАДЫЙКОВА.
Денис авылы, Шенталы районы.
Просмотров: 1044
Кызлар Сезгә Аллаһ тарафыннан меңләб меңләб Рәхмәтләр яусын,шундый Изге айда Ифтар уткәрнәнсез!
Амин Безнен Татар халкы гомер. Гомергэ ураза аен зурлап яшэде ул шулай булыр да Инша Аллах