Самара халкы махсус хәрби операция зонасындагы якташларыбызга актив ярдәм итә. Һәркем булдыралган кадәр үз өлешен кертергә тырыша: кемдер маскировка челтәрләре үрә, окоп шәмнәре ясый, кемдер гуманитар ярдәм җыя, хәрбиләрнең гаиләләренә булыша.
Шәһәрнең Киров районы депутатлар Советы депутаты Равил Фазлетдинов та активистлар исемлегендә. Күптән түгел ул Луганск өлкәсендә урнашкан өченче батальонның 30 бригадасында хезмәт итүче Самара егетләре янына барып кайткан.
«Егетләргә маскировка челтәрләре, югары үтемле (с высокой проходимостью) автомобиль, электр генераторлары, медицина препаратлары, рацияләр һәм башка кирәк-яраклар илттек. Зубчаниновка бистәсенең Мәдәният йортында шөгыльләнүче балалар солдатларга матур теләкләр белән хатлар язган иделәр. Аларны да тапшырдык. 1 июньдә, Балаларны яклау бәйрәме уңаеннан, торак пунктлар буйлап йөреп, балаларга тәм-томнар тараттык.
Луганск өлкәсенә илткән гуманитар ярдәм волонтерлар, халык һәм активистлар белән берлектә, шулай ук Самара өлкәсе мөфтие Талип хәзрәт Яруллин ярдәме белән җыелды. Якын арада тагын сәфәргә чыгарга җыенабыз. Чөнки сугыш сызыгыннан яңа үтенечләр алдык», — дип сөйли депутат.
Кешеләр берләшүне дәвам итәләр, беренчел кирәк-яраклар, азык-төлек, дарулар җыялар һәм солдатларыбызның җиңү яулап, сау-сәламәт булып өйләренә кайтуларын түземсезлек белән көтәләр.
Ринат НОГМАНОВ.
«Бердәмлек».
Просмотров: 681