Таныш булыгыз: милләт диеп җан атып йөрүче якташыбыз

Булат әфәнде — гаиләдә үрнәк әти, хөрмәтле ир.

Әлеге сүзләр тумышы белән Самар өлкәсенең Камышлы авылыннан булган, бүгенге көндә Ханты-Ман­си автономияле округында Татарстан Респуб­ликасының сәүдә-икътисад вәкиле йөген тартучы Булат Бәдретдинов турында.

Булат урта мәктәп тәмам­лап, армия сафларында хезмәт итә. Бәхет эзләп, 1986 елда Себер якларына чыгып китә. Биредә читтән торып, югары уку йортында инженер-эко­номист һөнә­рен үзләш­терә. Сабадан килгән Раилә исемле чибәр кыз белән танышып, гаилә кора. Нефтеюганск каласында төп­ләнеп, бер ир, бер кыз бала (Радик белән Регинаны) тәрбияләп үстерәләр.

Әлеге дәрәҗәле вазыйфага алынганчы машина йөр­түче дә, төзүче дә булган ул. Шул ук вакытта иҗ­ти­магый эшкә дә актив җи­гелгән. Милләт диеп җан атып йөргән Булат Бәдрет­диновка 2010 елда Та­тарстанның тулы вәкаләт­ле илчесе булу вазыйфасын йөклиләр. Ханты-Манси ок­ругы белән Татарстан Рес­пуб­ликасын бәйләү­че буын­нарның берсе ул бүген.

Хан­ты-Манси ок­ругының атказанган мә­дә­ният хезмәт­кәре дигән ис­емгә дә лаек була Булат әфәнде. Милләтебезнең тормышына игътибарлы якташыбыз ХМАО-Югра җирлегендә дини һәм милли оешмалар­ның эшен юлга салуда да өлешен кертә, хәйрия фондын оештыра. Булат кебек фидакарьләр көче белән күп кенә шәһәр­ләрдә татар-милли-мәдәни үзәкләре барлыкка килә. Нефтеюганск каласында татар китапханәсе һәм татар телен өйрәнү өчен сыйныф ачыла. Сабантуй бәйрәмнәре оештырыла башлый. Вәки­л тырышлыгы һәм катнашы белән Аллаһы Тәгалә йорты – мәчет калкып чыга. Мөселман зираты булдыруда да аның өлеше зур.

Күпләр җәйге яллардан шәхсән үз хаҗәтләре өчен кирәкле әйберләр алып кайтса, Булат әфәнде Казан шәһә­реннән үз машинасына татар сыйныфы өчен дәреслекләр, методик кулланмалар төяп алып кайта.

Кәзимә апа Камышлы районының Дәүләткол авылында яши.

Әнисенең исән булуы белән дә бәхетле Булат әфәнде.  Кәзимә апа Дәүләтколда яши. Быел авылның 95 еллык юбилеен каршы алуга багышланган Сабантуйда Камышлы районы һәвәскәрләреннән тыш Татарстанның атказанган артистлары Айгөл Бариева һәм Илнар Сәйфиев та чыгышлар ясаган иделәр. Казаннан җырчыларны якташыбыз Булат Бәдретдинов чакырган булган.

Сәмига НУРУЛЛИНА әзерләде.

Камышлы районы.

samtatnews.ru

Просмотров: 5191