Дөрес булса, татар эстрадасында җырчылар 800 кешедән артып китә икән. Әле шунда ыргылучылары, юл ярырга тырышучылары тагын күпме! Казанда вокал серләренә КФУда, Казан мәдәният һәм сәнгать институтында, консерваториядә, училищеларда төшендерәләр. Уйлап баксаң, бу уку йортлары җырчылар армиясе әзерләп чыгара кебек.
Җырчылар барыбер җитми һәм югары, урта белем бирүче уку йортларына нәкъ менә шушы һөнәргә игътибар итәргә киңәш ителә. Татарстан Министрлар Кабинетының иң кирәкле белгечлекләре исемлеге белән танышкач, шундый фикергә киләсең. 2018 – 2024 елларда иң кирәкле һөнәр ияләре исемлегенә җырчылардан кала, фотографлар, зәркәнчеләр, визажистлар, дирижерлар, дизайнерлар кергән. Музей белгечләре, сәнгать өлкәсе тарихчылары, психолог, педагогларга да кытлык бар. Белгечлекләр арасында заманчалары, яңалык булырдайлары да җитәрлек. Робот техникасы белгечлеге, мәсәлән. Очкыч сынаучылар да җитми икән.
Шулаен шулай, әмма гуманитар өлкәдә кирәкле һөнәр ияләренең хезмәт хаклары әллә ни югары түгел бит. Әйтик, музей белгечләренең хезмәт хаклары 7 мең сумнан башлана. Сәнгать тарихын язучылар да әллә ни зур хезмәт хакы ала дип уйлап булмый. Исемлеккә кергән белгечлекләрнең абруе да күтәрелсә, мәсьәлә икенче юнәлеш алыр иде.
Эшкә урнашу мәсьәләсе дә четерекле. Исемлектәге актер һөнәре буенча эшкә урнашу кискен тора дип фаразларга җирлек бар. Талантлылары Казаннан читкә китә, калганнары урамда кала. Кайберләре мәктәпләрдә театр түгәрәкләре ачып карый, күбесе икенче белгечлекләр үзләштерүгә керешә. Моны “Әкият” курчак театры режиссеры, педагог Илдус Зиннуров та яшерми: “Бик азлар гына, укып бетергәч, актерлык эшендә кала, ир-егетләр бер-ике курс укыгач та икенче һөнәр үзләштерергә керешә”, – ди ул.
КФУның Филология һәм мәдәниятара коммуникацияләр институты директоры Рәдиф Җамалетдинов, исемлектәге һөнәрләр түгел, беренче чиратта чит тел белгечлекләрен үзләштерүгә сорау зур, ди.
– Икенче урында – дизайн белгечлеге. Без төрле өлкәдәге, шул исәптән җитештерү өлкәсендә һөнәри белем бирүче осталарны да әзерлибез. Алар 2-3 курстан ук эшли башлыйлар. Бу белгечлек ияләре эшкә урнашу буенча кыенлык күрми, – диде Рәдиф әфәнде.
Исемлек интернетта шау-шу куптарырга өлгерде инде. Композитор Оскар Усманов шәхси битендә җырчыларга кытлык бар дигән мәгълүмат урнаштыру белән комментарийлар ява башлады. Берәүләрнең ачуын аларның болай да күплеге чыгарса, икенчеләре исемлек белән килеште. Җырчылар аз, башкаручылар гына күп, дип язды алар. Чын җырчыларга Илһам Шакиров, Флера Сөләйманова, Әлфия Авзалова, Филүс Каһировларны кертсәләр, башкаларын “кыздыручылар” дип атадылар. Ә бит исемлектә сүз эстрада җырчылары турында түгел, җыр укытучылары турында иде…
“Ватаным Татарстан” (№ 50, 07.04.2017).
Просмотров: 872