Якынлашып килүче Ураза уңаеннан Самараның Тарихи мәчетендә “Рамазанга керү ишекләре” дип аталган чара уздырылды. Бәйрәмдә Региональ Диния нәзарәте рәисе, мөфти Талип хәзрәт Яруллин да катнашты.
Билгеле булганча, Рамазан аенда Мөхәммәт галәйһиссәламгә Коръән сүрәләре иңдерелә башлаган. Шушы изге айда бакыйлыкка күчүчеләр өчен оҗмах ишекләре гел ачык тора, ә җәһәннәм ишекләре ябыла, дип языла дини китапларда. Ә фани дөньяда ураза тоткан кешеләрнең гөнаһлары юып төшерелә.
- Телевизор, гаджет экраннарына ябышып ятудан аерылып, үзара аралаша башларга, берләшергә кирәк, — дип сөйләделәр бу чараны оештыручылар. — Без балаларыбызга яхшылык, иманлылык, илтифатлылык мирасын сеңдерергә, бер-беребезгә булышып, яхшы эшләр эшләүдә ярышып яшәргә тиешбез.
Бәйрәмдә катнашкан балалар “Рамазанга керү ишекләре”н эзләп табу өчен берничә бирем үтәргә тиешләр иде. Алар Аллаһының 99 исемен исләренә төшерделәр, Рамазан ае турында шигырьләр укыдылар, изге айда үз-үзләрен тоту кагыйдәләре турында открыткалар ясадылар. Кыз балаларга төрле-төрле тукымалардан тегелгән хиҗаб кию конкурсы бигрәк тә ошады.
Ә аналар өчен үткәрелгән “Күңелең ниләр пышылдый” шигъри конкурсы бәйрәмебезнең энҗесенә әверелде. Үзе яраткан шигырен укыган һәр хатын-кыз йөрәгенең бер өлешен ачып күрсәтте сыман. Нечкә күңелле тамашачылар бу юлларны тыңлаганда күз яшьләрен сөртеп утырдылар.
Ахырда балаларга татлы күчтәнәчләр һәм “Рамазан көндәлеге” дип аталган китаплар өләшенде, хатын-кызлар пешереп алып килгән тәм-томнар белән чәй өстәле әзерләнде.
- Бу бәйрәмдә катнашучылар үзләрен зур бер гаилә әгъзалары кебек хис иттеләр. Бу бик мөһим тойгы, — диде бәйрәм ахырында Тарихи мәчетнең имам-хатыйбы Наил хәзрәт Биктаев. — Иншалла, мондый очрашуларны ешрак оештырырга ниятлибез. Шундый чараларда балалар ислам дине нигезләрен һәм кыйммәтләрен үзләштерәләр. Балаларыбызның киләчәге безнең кулыбызда.
Алина ФРОЛОВА,
педагогия университеты укытучысы, доцент.
Просмотров: 1026