Хезмәт юлым “Бердәмлек”тә башланды…

Римма НУРЕТДИНОВА (уңда) Россия Федерациясенең атказанган, Татарстан Республикасының халык артисткасы Исламия МӘХМҮТОВА белән.

Бүгенге көндә өлкәбездә татар телендә мөселманнар тормышында булган барлык яңалыклар белән мил­ләт­тәш­ләребезне даими рәвештә таныштырып баручы мәгълүмат чаралары аз түгел. Шулар арасында “Самар татарлары” медиа-порталы лаеклы урын алып тора. Биредә һәркем үзе өчен кирәкле мәгълүматны тапсын өчен, аның баш мөхәррире Римма Нуретдинова, әлбәттә, зур көч куя. Кызыклы язмалар, аудио- һәм видео материалларны төрле чыганаклардан җыеп, татарлар тормышындагы яңалыкларны беренчеләрдән булып безгә ул хәбәр итә, дисәң дә дөрес булыр, минемчә. Юкка гына, шаяртып, кайберәүләр аны “Римма-ТАСС”, дип атамыйлардыр.

Римма туташның хезмәт һәм иҗат юлы “Бердәмлек” газетасыннан башланып китә. Самара дәүләт педагогия уни­верситетының журналистлар факультетында укыганда ук инде ул әлеге газета ре­дак­циясендә баштан хәреф җыючы булып эшли башлый, соңрак дизайнер-верстальщик, бүлек мөдире вазифаларын башкара.

- “Бердәмлек” хезмәт­кәрләре журналистикага беренче адымнарымны ясауда зур роль уйнадылар. Газетаның баш мө­хәррире Рәфгать абыйга да, бүлек мөдире Эльмира апа белән җаваплы секретарь Зәйнәп апага да мин бик рәх­мәтлемен, “Бердәмлек” бе­лән бүген дә дус бу­лып, үзара мәгъ­лү­матлар алышып, хез­мәттәшлек итүебезгә бик шатмын. Биредә туплаган белемем соңрак “Ислам нуры” газетасында редактор урынбасары вазифасында эшләргә нык ярдәм итте, — ди Римма.

Ә инде медиа-портал белән җи­^­­тәкчелек итү тәҗ­рибәсен ул күп­ләргә таныш булган “Дуслык” ин­тернет сайтында туплый. Кайда гына эшләсә дә үз вазифала­рын җаваплы үтәгән Рим­мага, иҗ­ти­ма­гый эшләр­дә дә актив катнашып, Бө­тендөнья татар конгрессы корылтаенда, 2013 елда Казанда уз­ган Универсиа­да да, быел II Бө­тендөнья татар ха­­тын-кызлары форумында да катнашырга туры килә.

2010 елда җанисәп алуда катнашканы өчен федераль дәрәҗәдәге медаль, Самара өлкә “Туган тел” оешмасының 25 яшьлеге уңаеннан Бөтен­дөнья татар конгрессыннан Мак­­тау грамотасы, Самара өл­кә­сендә татар мәдәниятен һәм гореф-гадәтләрен сак­лауга зур өлеш керткәне өчен өлкә губернаторының Рәх­мәт хаты белән бүләкләнгән Рим­ма Нуретдинова яшь мил­ләттәшләребез күңел­лә­рендә горурлык хисе уята.

Алия АРСЛАНОВА.

«Бердәмлек» .

Просмотров: 1861