Азалия Шәрәфетдинова.
Үткән елның декабрендә Самараның мәгариф департаменты укучылар арасында Яңа ел темасына рәсем бәйгесе игълан иткән иде. Күптән түгел аның җиңүчеләре билгеле булды. Алар арасында милләттәшебез Азалия Шәрәфетдинова да бар.
Азалия Самараның 90 санлы гомумбелем мәктәбендә 10нчы сыйныфта укый, шул ук вакытта Самараның 4 санлы сәнгать мәктәбендә рәсем ясау буенча белем ала.
- Азалия бик талантлы кыз, графика эшләре дә, майлы буяу белән төшерелгән картиналары да бик матур. Балалар арасында үткән рәсем бәйгеләрендә аның эшләре һәрвакыт җиңүчеләр рәтендә була. Үткән елның мартында яшьләр бөтенроссия рәсем бәйгесендә “Ал чәчәк” әкияте буенча ясалган рәсеме белән Азалия Самара өлкәсендә беренче урынны яулады, — дип горурланып сөйли аның остазы Ольга Тараскина.
“Киләчәктә күргәзмә оештырырга теләмисеңме?” — дигән сорауга Азалия: “Мондый теләгем булса да, күргәзмәгә куярлык эшләрем үземдә сакланмый. Аларны бәйгеләр оештыручылар үзләренә алып кала, йә туганнарым, иптәшләрем истәлеккә сорап алалар. Заказ буенча рәсем ясарга тәкъдимнәр дә байтак, әмма моның өчен әлегә вакытым юк, БДИга әзерләнәм”, — ди яшь милләттәшебез. Булачак һөнәрен дә Азалия рәсем ясау белән бәйләргә тели. “Дизайнер булып кешеләргә өйләрен матурлатырга ярдәм итәсем килә”, — ди Азалия.
Әминә ШИҺАПОВА.
Просмотров: 1335