Татар гаиләсен Балыклы авылында яшәүче Рәшит һәм Илсөяр Фәрдиевлар тәкъдим итте.

Похвистнево районының Гали авылында “Милли гаи­лә — ил байлыгы” дип атал­ган фестиваль узды. Бу чара Са­мара өлкәсе хатын-кыз­лары иҗтимагый оешмасы тара­фын­­нан дүртенче тапкыр үткәрелә.

Быелгы фестивальгә кунак­лар Кләүле, Камышлы, Исаклы, Кинель-Черкасс һәм Похвистнево районнарыннан җыелды. Аларны “Самара өлкәсе хатын-кызлары” иҗтимагый оешмасы рәисе Анна Васильева, Пох­вистнево районы башлыгы Юрий Рябов сәламләделәр һәм бәйгедә катнашучыларга уңышлар теләделәр.

Соңгылары чынлап та сынатмады. Рус, татар, чуваш, морд­ва, немец милләтеннән булган алты гаиләнең барысы да лаеклы чыгыш ясап, фес­тивальне күркәм бәйрәмгә әйләндерделәр. Алар тамаша­чыларга һәм жюри әгъ­за­ларына үз гаиләләре турында сөй­ләделәр, сәхнә осталык­ла­рын күрсәттеләр. Балаларда мил­ли әдәбиятка карата кызыксыну уятуга юнәлтелгән «Ана теле» һәм «Гаилә белән укыйбыз» бәйгеләре аеруча кызык­лы үтте.

Бергартлар гаиләсе (Пох­вистнево районы) тамашачыларны немец халкының мәдә­нияте һәм гореф-гадәтләре белән таныштырдылар. Лилия ханым Бергарт – Похвистневода гына түгел, бөтен өлкәгә танылган кул остасы. Ул агачтан төрле уенчыклар, йорт кирәк-яраклары ясый, кызларын, онык­ларын да үз шөгыленә өйрәтә. Кул эшләре күргәзмәсендәге, аның үз куллары белән ясаган милли курчакларын күреп сокланмаган кеше калмагандыр, мөгаен.

Кләүле районыннан кил­гән Александр һәм Наталья Алексеевлар да гаиләләре турында кызык­лы презентация әзерләгәннәр иде. Алар чу­ваш­ йолалары, хатын-кыз киеме элементлары турында да мавыктыргыч итеп сөйләделәр.

Татар гаиләсе дә алардан калышмады. Камышлы районының Балыклы авылында яшәүче Рәшит һәм Илсөяр Фәрдиевлар нәсел­ләрендә 200 елга якын сакланган Коръән китабын һәм хатын-кыз киемен (Фәрдиевләр сүзләренчә аңа 100 ел) тәкъдим итеп, жюри әгъзаларын таң калдырдылар.

Беренче урын Похвистнево районының Ахрат авылыннан килгән Николай һәм Людмила Макаровлар гаиләсенә бирелде. Алар кызлары Ксения һәм уллары Егор белән этнофестивальнең өлкә этабында да катнашачаклар.

Милли киемнәрнең матурлыгы, җыр-биюләрнең үзен­чәлеге, дусларча җылы атмосфера бәйрәмне искиткеч матур итте. Ахырда Самара өлкәсе хатын-кызлары иҗтимагый оешмасы рәисе Анна Васильева һәм өлкә Гаиләгә һәм балаларга социаль ярдәм күрсәтү үзәгенең гомуми мәсьәләләр буенча директор урынбасары Светлана Слесарева чарада катнашучыларга дипломнар һәм кыйммәтле бүләкләр тапшырдылар. Ә Юрий Рябов, фестивальне югары дәрәҗәдә оештырганы һәм үткәргәне өчен, Рәхмәт хаты белән бүләкләнде.

“Милли гаилә — ил байлыгы” фестиваленең киләсе елда Кинельдә үтәчәге билгеле булды һәм оештыручылар чараның символы — “Бичура” сынын шу­шы район вәкиленә тапшырдылар.

Әминә ШИҺАПОВА әзерләде.

«Бердәмлек».

КОНТЕКСТ:

В Алькино прошел этнофестиваль «Наше достояние — национальная семья» (ВИДЕО)

Просмотров: 1101