Эштә чыныгып үскән кешеләрнең кулларына карап, сокланмыйча мөмкин түгел. Авыр хезмәттән кытыршыланып бетсә дә, алар күз явын алырлык әйберләр эшләргә сәләтле.
Мәсәлән, Камышлы район үзәгендә яшәүче Фәнис Гыйззәтов агачтан уеп көнкүреш җиһазлары ясый. Останың кул эшләре район һәм өлкә күләмендә узган күргәзмәләрне дә бизи. Фәнис абыйга еш кына өй җиһазлары ясарга заказлар бирәләр. Нарат, юкә һәм каен агачыннан ясаган шкафлар, караватлар, тумбочкаларның матурлыгын күрсәң, исең китәр!
Бу эш белән ул очраклы рәвештә шөгыльләнә башлаган. 1985 елда, Әфганстанда хезмәт итеп кайткач, Фәнис сөйгән кызы Венерага өйләнә, бер-бер артлы кызлары Ленара һәм уллары Данис туа. Тик, үзләренең йортлары булмаганлыктан, Гыйззәтовлар гаиләсе бер йорттан икенче йортка күчеп йөрергә мәҗбүр була. “Чын ир кеше йорт төзергә, агач утыртырга һәм малай үстерергә тиеш” дигән халык мәкален искә төшереп, Фәнис йорт салырга керешә.
- Бу 1990 ел иде. Агач белән шул вакытта эшли башладым. Ә йортыбызны, әти-әни ярдәме белән, тиз салып бетердек. Моның өчен мин аларга бик рәхмәтлемен, — дип искә ала балта остасы.
Гыйззәтов сүзләренчә, агачтан уеп ясау эшенә ул махсус өйрәнмәгән.
- Мин Самараның сәнәгать техникумында комбайнчы һөнәрен үзләштердем. Әтием – тракторчы, абыем слесарь иде. Агачтан матур әйберләр ясау сәләтен миңа Аллаһы Тәгалә Үзе биргәндер. Берәр нәрсә ясап бирүемне соралсалар, мин шунда ук бу әйберне нинди агачтан, ничегрәк итеп ясау турында уйлана башлыйм, аны күз алдына китерәм. Эскизларны компьютерда ясамыйм, кулдан кәгазьгә төшерәм, — дип сөйли Фәнис абый.
Остаханәсендә эш өчен бөтен уңайлыклар да тудырылган. Һәр инструменты үз урынында. Аларның да күбесен Фәнис үз куллары белән ясаган. Хезмәтен яратып, бөтен күңелен биреп эшләгән остага бер әйберен дә кире кайтаручы, сыйфатына шелтә белдерүче булмаган.
Фәнис Мөдәррис улын киң профильле белгеч дип атарга була. Ул йорт җиһазлары да ясый, биналарның эчке бизәлеше белән дә шөгыльләнә. Йорт төзергә кирәксә — бригадасы да бар.
Ә өенә керүгә үзеңне әкият дөньясына килеп кергәндәй хис итәсең. Останың кул эшләре һәр бүлмәне бизәп, өйне үзенчәлекле итә. Ишекләр, урындык-өстәлләр, телевизор тумбочкасы — һәр әйбердә хуҗаның кул җылысы, күңел матурлыгы саклана. Йортның тышкы бизәлеше дә таң калдырырлык.
Балаларының ни белән мавыгулары турында сорагач: “Алар инде зурлар. Кызыбыз — Самарада, улыбыз гаиләсе белән авылда яшиләр. Данис малай чагында остаханәгә еш керә, хезмәтемнең серләренә төшенергә тели иде. Тик эш урынымда балалар өчен куркыныч, үзем өйдә булмаганда, кереп җәрәхәтләнерләр, дип курка идем. Даниска да: “Гаиләдә бер балта остасы булгач, шул җиткән, син башка һөнәр сайла”, — дип киңәш иттем. Ул Нижний Новгородта хокук академиясен тәмамлады, бүген полициядә хезмәт итә”, — дип сөйләде Фәнис Гыйззәтов.
Шулай да егет әтисенең эшләре белән кызыксына, кирәк чакта ярдәм итеп тора икән. Бүген ул үзенә йорт салу белән мәшгуль. Ә Фәнис абый, кайчандыр әтисе аңа ярдәм иткән кебек, улына йорт салырга булыша.
Балта остасы турында авылдашлары да, район җитәкчелеге дә бары тик җылы сүзләр сөйли. Ул күптөрле бүләкләр, Мактау кәгазьләре белән дә бүләкләнгән.
- Районыбызда Фәнис Мөдәррис улы кебек алтын куллы, киң күңелле кеше яшәве белән горурланабыз. Төрле бәйгеләр, чаралар уздырганда, без еш кына аңа теге яки бу әйберне ясап бирүен, яисә күргәзмәгә кую өчен кул эшләрен сорап торабыз. Рәхмәт, бер генә дә кире какканы юк, һәрвакыт ярдәм итә, — дип сөйли Камышлы районының үзәк китапханәсе мөдире Римма Галимуллина.
Үз шөгыленә бирелгән Фәнис абый тирә-якны матурлата, башкаларны сөендерә алырлык эш эшли. Аның алтын куллары гап-гади агач кисәген күп еллар дәвамында кешеләргә хезмәт итәрлек әйбер-җиһазга әверелдерә. Киләчәктә дә остага илһам, иҗади уңышлар теләп калабыз.
Җәмилә ШӘРИФУЛЛИНА.
«Самар татарлары» журналы, № 4 (25), октябрь-декабрь, 2019 ел.
Просмотров: 1218