Әзерлек башланды

1-DSC_0917Үткән сишәмбедә өл­кә татар милли-мәдәни авто­номиясенең киңәйтелгән уты­рышы уздырылды

Бу көнне Халыклар дуслыгы йортына бөтен татар оешмаларының җитәкчеләре һәм активистлар килгән иде. Көн тәртибендә — 14 июньдә Шенталы районының Татар Әбдекие авылында уздырылачак икенче өлкә авыллары Сабан туена һәм 21 июньдә Гагарин паркында уздырылачак 26нчы өлкә Сабан туена әзерлек эшләре мәсьәләләре генә торса да, хәл ителергә тиешле эшләр байтак булып чыкты.

“Бердәмлек” газетасының җа­ваплы секретаре Зәйнәп Нәбиулла кызы Әһлиуллинаны 75 еллык юбилее белән котлау утырышның иң күркәм мизгеле булгандыр, мөгаен. Бу тантананы өлкә милли-мәдәни автономиясе рәисе Әнвәр Гор­ланов һәм аның директоры Шамил Галимов оештырганнар. Башка татар оешмалары җитәкчеләре дә залга чәчәкләр күтәреп керделәр, ә өлкә администрациясендә җә­мәгать фикерен өйрәнү де­пар­таментының милли һәм конфессиональ сәясәт идарәсе консультанты Вера Алексеева губернаторның Почет грамотасын һәм кыйммәтле бүләген алып килгән.

Зәйнәп апага тапшырылган Мактау грамотасында: “Эт­ник журналистиканы, татар мәдәниятен һәм гореф-гадәтләребезне саклау һәм үс­терү эшенә керткән зур өлеше өчен”, дип язылган иде. Вера Иванова Зәйнәп апага матур сүзләр әйтеп бүләкләрен биргәч, “Туган тел” һәм шәһәр автономиясе җитәкчеләре дә букетларын һәм бүләкләрен тапшырып, татар җәмгыятенә күп еллар хезмәт итүе өчен рәхмәтләрен белдерделәр.

Татар оешмалары, татар матбугат чаралары арасында көндәшлек, каршылыклар бар, дип күпме генә сөйләсәләр дә, авыр вакытларда алар бер-берсенә гел булышалар. Котлау шау-шуы тынгач, “Бердәмлек” газетасының баш мөхәррире Рәфгать Әһлиуллин  сүз алып, “Дуслык” оешмасы президен­ты Фәхретдин Бәдретдин улы Канюкаевка рәхмәтләрен җит­керде. Почта тарифлары кис­кен рәвештә күтәрелгәч, әбү­нәчеләребезнең чыгымнарын киметү өчен Фәхретдин әфәнде “Бердәмлек”кә беренче булып 100 мең сум акча күчергән дә инде. Шундый милли җанлы байларыбыз күбрәк булса, кеч­ке­нә генә пенсиягә яшәүче апа-­абыйларыбыз газета уку бә­хетеннән мәхрүм булмаслар иде.

Утырышның төп мәсьә­лә­сенә — Самара Сабан туен оештыру эшенә күчкәч, үткән еллар тәҗрибәсе җентекләп тикшерелде. Мәсәлән, былтыр футбол кырына урнаштырылган икенче сәхнәнең урыны бик үк уңышлы булып чыкмады. Бәлки, ул бөтенләй кирәкмидер дә. Быел көрәш мәйданы күл өстендәге сәхнәдә булачак, дигән уртак фикер бар. Ә менә концерт программасын кайда сыйдырып бетерергә – әлегә билгесез.

Үткән елгы Сабантуйның иң матур күренеше — гармунлы “пятачок”лар да халыкка бик ошаган иде. Быел аларны күб­рәк ясарга кирәк, дигән уй туды, Казан артистларын чакыру буенча да төрле сүз булды. Шуңа күрә бу мәсьәлә киләсе утырышта да тикшереләчәк әле.

Ә Татар Әбдекие Сабан туена килгәндә, проблемалар булмаска тиеш. Аны оештыруны авылдашлары  Хәбил Бикташев үз өстенә алып, менә дигән Сабантуй күрсәтер әле. Татар Әбдекие Сабан туе буенча сораулар булмады диярлек.

Шулай ук 15 апрельгә бил­геләнгән татар җәм­гыятьләре лидерларының губернатор Ни­колай Меркушкин белән оч­­рашуы, Кырым татарлары­на теләктәшлек белдереп мө­­рә­җә­гать язу, өлкә мат­бугат чаралары өчен пресс-конференция оештыру, Мә­дә­ният елы уңа­еннан үткә­релергә тиешле чаралар турында да фикер алышу булды.

Сәлимә ИШМӨХӘММӘТОВА.

Римма НУРЕТДИНОВА фотосурәте.

«Бердәмлек»

Бу темага: 

Состоялось расширенное заседание исполкома Самарской областной татарской национально-культурной автономии

 

Просмотров: 1263

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>